హఠాత్తుగా సజ్జనార్ బదిలీ ఎందుకు?

వీసీ సజ్జనార్ ఐపీఎస్..ఇరు తెలుగు రాష్ట్రాల్లో ఈ పేరు తెలియనివారుండరు. 2008లో వరంగల్ ఎస్పీగా సజ్జనార్ పనిచేస్తున్నప్పుడు యాసిడ్ దాడికి పాల్పడిన ముగ్గురు నిందితుల ఎన్ కౌంటర్, 2019లో సైబరాబాద్ సీపీగా ఉన్నపుడు దిశ కేసు నిందితుల ఎన్ కౌంటర్ ఘటనలు దేశవ్యాప్తంగా చర్చనీయాంశమైన సంగతి తెలిసిందే. ఆ తర్వాత తెలంగాణ ఆర్టీసీ ఎండీగా పనిచేసిన సజ్జనార్ అక్కడ కూడా తన మార్క్ చూపించి వార్తల్లో నిలిచారు. 14 నెలలుగా హైదరాబాద్ సీపీగా పనిచేస్తున్న సజ్జనార్ ను హఠాత్తుగా రేవంత్ సర్కార్ బదిలీ చేసిన వైనంతో సజ్జనార్ మరోసారి వార్తల్లో నిలిచారు.

సజ్జనార్ ను ప్రభుత్వం ఉరుములు లేని మెరుపుల్లా…ఆఘమేఘాల మీద ఎందుకు బదిలీ చేసింది అన్న విషయంపై ఇప్పుడు మీడియాలో, సోషల్ మీడియాలో తీవ్రస్థాయిలో చర్చ జరుగుతోంది. సాధారణ బదిలీ అయితే…ఇంత చర్చ జరిగేది కాదు. తనకు అప్పగించిన శాఖపై తమ ముద్ర వేసేలా విధులు నిర్వహిస్తూ ఇటు ప్రభుత్వ..అటు ప్రజల మద్దతు చూరగొన్న అతికొద్దిమంది పోలీసు అధికారులలో సజ్జనార్ ఒకరు. అందుకే, ఉన్నపళంగా సజ్జనార్ బదిలీ కావడం వెనుక కారణాలపై చర్చలు, విశ్లేషణలు మొదలయ్యాయి.

అంతేకాదు, హైదరాబాద్ సీపీ వంటి పవర్ ఫుల్ పోస్ట్ నుంచి ఫైర్ సర్వీసెస్ డీజీ వంటి ఇంపార్టెన్స్ లేని పోస్ట్ కు బదిలీ చేయడం ఇప్పుడు హాట్ టాపిక్‌గా మారింది. అటు బీఆర్ఎస్ హయాంలో…ఇటు కాంగ్రెస్ హయాంలో…సజ్జనార్ కు ప్రాధాన్యత దక్కింది. ఏరి కోరి సజ్జనార్ ను సీపీగా ఎంపిక చేసిన రేవంత్ సర్కార్…హఠాత్తుగా ఈ నిర్ణయం ఎందుకు తీసుకుంది అన్నది మిలియన్ డాలర్ల ప్రశ్న.

కొద్ది రోజులుగా జరుగుతున్న పరిణామాలు, కీలక ఘటనల నేపథ్యంలోనే సజ్జనార్ ను బదిలీ చేసినట్లు తెలుస్తోంది. బీఆర్ఎస్ కు అనుకూలంగా ఉంటున్నారంటూ సజ్జనార్ పై కొందరు కాంగ్రెస్ నేతలు అసంతృప్తి వ్యక్తం చేసినట్లు తెలుస్తోంది. ప్రత్యేకించి ఇటీవల ముఖ్యమంత్రి విషయంలో జరిగిన కొన్ని పుకార్లు, పరిణామాల నేపథ్యంలో సజ్జనార్ పై సీఎం రేవంత్ రెడ్డి కూడా గరంగరంగా ఉన్నారని ఊహాగానాలు వినిపిస్తున్నాయి. అయితే, తన ఇంట్లో శుభకార్యం కోసం సెలవు పై వెళ్తున్నారని మరో ప్రచారం తెరపైకి వచ్చింది. అందుకే, ఆయన అప్రాధాన్యమైన ఆ పోస్ట్ లోకి వెళ్లారని పుకార్లు వస్తున్నాయి.

అంతేకాదు, కొంతకాలం తర్వాత సజ్జనార్ తిరిగి కీలక హోదాలో కమ్ బ్యాక్ ఇస్తారన్న టాక్ కూడా వస్తోంది. 2028 అక్టోబర్ లో రిటైర్మెంట్ కాబోతున్న సజ్జనార్ పవర్ ఫుల్ పోస్ట్ లో..అంటే డీజీపీ హోదాలో రిటైర్ అవుతారని కూడా కొందరు జోస్యం చెబుతున్నారు. ఈ క్రమంలోనే తన ట్రాన్స్ ఫర్ పై సజ్జనార్ స్పందించారు. హైదరాబాద్ సీపీగా పని చేసిన కాలం అపురూప ప్రయాణం అని అన్నారు. తనకు అవకాశం కల్పించిన ప్రభుత్వానికి ధన్యవాదాలు తెలిపారు.