మళ్లీ మొదలైన కొలికపూడి పంచాయితీ

తిరువూరు ఎమ్మెల్యే కొలికపూడి శ్రీనివాస రావు నిత్యం వివాదాల్లో ఉంటున్న సంగతి తెలిసిందే. అమరావతి రైతు ఉద్యమం ద్వారా వెలుగులోకి వచ్చిన కొలికూడికి టీడీపీ అధినేత చంద్రబాబు పిలిచి మరీ టికెట్ ఇచ్చారు. తిరువూరు టికెట్ కోసం ఎంతోమంది పోటీలో ఉన్నా సరే అమరావతి ఉద్యమ సమయంలో కొలికపూడి పడిన కష్టానికి గుర్తింపు దక్కాలని చంద్రబాబు భావించారు. అయితే, చంద్రబాబు ఇచ్చిన గౌరవాన్ని, గుర్తింపును కొలికపూడి శ్రీనివాసరావు నిలబెట్టుకోలేకపోయారనే చెప్పాల్సి వస్తోంది.

పార్టీ లైన్ దాటవద్దని, ఏవైనా విషయాలుంటే చర్చించి పరిష్కరించుకోవాలని, రోడ్డెక్కవద్దని టీడీపీ క్రమశిక్షణా కమిటీ వారించినా సరే కొలికపూడి తీరు మాత్రం మారడం లేదు. గతంలో ఎన్నిసార్లు బుజ్జగించి చెప్పినా సరే కొలికపూడి మాత్రం నేనింతే అంటూ మరోసారి తన వివాదస్పద వ్యాఖ్యలను కొలికపూడి మళ్లీ మొదలెట్టారు.

తిరువూరు నియోజకవర్గం ఎస్సీ రిజర్వ్డ్ కావడంతోనే తన విషయంలో వివక్ష చూపిస్తున్నారని ఆయన చేసిన వ్యాఖ్యలు వివాదాస్పదంగా మారాయి. తన నియోజకవర్గంలో జరుగుతున్న అభివృద్ధి పనుల శంకుస్థాపనల గురించి తనకు తెలియడం లేదని, అదే వేరే సామాజిక వర్గానికి చెందిన ఎమ్మెల్యేలకు ఇలా జరుగుతుందా అని ఆయన ప్రశ్నించారు.

ఎస్సీ, ఎస్టీ, బీసీ సామాజిక వర్గాలకు చెందిన శాసన సభ్యులు మీ దృష్టిలో ఏంటి అంటూ ఆయన అన్నారు. విస్సన్నపేట మండలంలో తనకు సమాచారమివ్వకుండా సీసీ రహదారుల నిర్మాణ ప్రారంభోత్సవాలు ఎలా పెట్టుకుంటారని ప్రశ్నించారు. ఇక, తన నియోజకవర్గంలో అలజడులు సృష్టించేందుకు ప్రయత్నిస్తున్నారని కూడా ఆయన షాకింగ్ ఆరోపణలు చేశారు.

మరోవైపు, కొలికపూడి అనురులపై విజయవాడలోని రాష్ట్ర సాంఘిక సంక్షేమ బోర్డు ఛైర్మన్ పోలీసులకు ఫిర్యాదు చేశారు. తమ కార్యాలయం ఎదుట కొలికపూడి శ్రీనివాసరావు ధర్నా చేస్తారని చెబుతూ ఆయన అనుచరులు తనకు బెదిరింపు కాల్స్ చేస్తున్నారని ఆయన తన ఫిర్యాదులో పేర్కొన్నారు.