Gulte Telugu Telugu Political and Movie News Updates
ఉమ్మడి కృష్ణా జిల్లాలోని గుడివాడ అసెంబ్లీ నియోజకవర్గాన్ని రెండు దశాబ్దాలకుపైగా తన కనుసన్నలతో శాసించిన మాజీ ఎమ్మెల్యే కొడాలి శ్రీవేంకటేశ్వరరావు.. ఉరఫ్ నానీ.. గత 2024 ఎన్నికల్లో తొలిసారి ఓడిపోయారు. ఆ తర్వాత.. ఆయన నియోజకవర్గానికి దూరంగా ఉంటున్నారు. అయితే.. రెండు సంవత్సరాల తర్వాత.. ఇటీవల కొంత మేరకు యాక్టివ్ అయ్యారు. గత ఎన్నికల ప్రచారంలోనే నాని ఇవే తనకు చివరి ఎన్నికలు అని చెప్పుకున్నారు. కానీ ఇప్పుడు వచ్చే ఎన్నికల్లో మరోసారి పోటీకి రెడీ అవుతున్నారు. అయితే.. ఇప్పుడు ఆయన సత్తాకు స్థానిక ఎన్నికలు సవాల్గా మారనున్నాయి.
స్థానిక సంస్థల ఎన్నికల్లో గుడివాడ మునిసిపాలిటీ అత్యంత ప్రతిష్టాత్మకంగా మారింది. గత ఎన్నికల్లో ఓడిపోయిన కొడాలి.. ఇప్పుడు తన హవాను నిరూపించుకునేందుకు సిద్ధమవుతున్నారు. ఇక్కడ మొత్తం 31 వార్డులు ఉన్నాయి. గత 2014, 2021లో వైసీపీ ఇక్కడ విజయం దక్కించుకుంది. దీని వెనుక కొడాలి నాని బలంగా చేసిన ప్రయత్నాలు ఉన్నాయనడంలో సందేహం లేదు. అయితే.. ఇప్పుడు పరిస్థితులు సమూలంగా మారిపోయాయి. ఒకప్పుడు కొడాలికి అండగా ఉన్న యలవర్తి శ్రీనివాసరావు.. ప్రస్తుతం టీడీపీలో ఉన్నారు.
గతంలో యలవర్తికి.. పనిగట్టుకుని కొడాలి మునిసిపల్ చైర్మన్ పదవిని ఇచ్చారు. అయితే.. ప్రభుత్వం మారడంతో ఆయన కూడా మార్పు దిశగా అడుగులు వేశారు. ప్రస్తుతం కొడాలికి ఈ వ్యవహారం సెగ పెంచుతోంది. బలమైన స్థానిక నాయకులు లేకపోవడం.. టీడీపీ దూకుడుగా ఉండడం వంటివి గుడివాడలో కొడాలి వ్యూహాలకు చెక్ పెట్టే అవకాశం ఉందని అంటున్నారు. అయితే.. గత ఎన్నికలలో తనకు ఘోర పరాభవం ఎదురైన నేపథ్యంలో దాని నుంచి బయట పడేందుకు విశ్వప్రయత్నాలు చేస్తున్నారు. ఈ సారి గుడివాడ వైసీపీలో కాపులు కూడా తమకు సీట్లు ఇవ్వాలని డిమాండ్లు తెస్తున్నారు.
స్థానిక సంస్థల ఎన్నికల్లో గుడివాడలో వైసీపీ సత్తాను నిరూపించడం ద్వారా.. తన హవా తగ్గలేదని చెప్పుకొనేందుకు ప్రయత్నాలు ముమ్మరం చేస్తున్నారు. ఇదిలావుంటే.. ప్రస్తుత ఎమ్మెల్యే వెనిగండ్ల రాము స్థానికంగా చేపట్టిన అభివృద్ధిపనులు, ఎన్నారై నిధులతో చేస్తున్న ప్రాజెక్టులు వంటివి ప్రజల్లో చర్చకు వస్తున్నాయి. అదే సమయంలో పార్టీ పరంగా కూడా బలమైన కార్యకర్తలు ఉన్నారు. ఇక, వైసీపీ నుంచి వచ్చి టీడీపీలో చేరిన వారు కూడా ఎక్కువగా ఉన్నారు. దీంతో కొడాలిని సునాయాసంగా ఎదుర్కొనగలమన్న ధీమా టీడీపీ నాయకుల్లో స్పష్టంగా కనిపిస్తుండడం గమనార్హం. మరి ఏం జరుగుతుందో చూడాలి.
