Gulte Telugu Telugu Political and Movie News Updates
రాజకీయ కుటుంబాలకు చెందిన వారసులు ప్రజల ముందుకు రావడం కొత్త విషయం కాదు. అయితే చిన్న వయసులోనే ఆసక్తికర అంశాన్ని ఎంచుకుని డిజిటల్ వేదిక ద్వారా ప్రేక్షకులను చేరుకోవడం మాత్రం కొత్త తరహా ప్రయత్నంగా కనిపిస్తోంది. నారా దేవాన్ష్ ప్రారంభించిన ‘డైనో డీట్స్’ యూట్యూబ్ ఛానల్ కూడా అలాంటి ప్రయత్నంగానే చర్చకు వస్తోంది. సాధారణంగా రాజకీయ వారసులపై ప్రజల్లో ఉండే అంచనాలకు భిన్నంగా.. డైనోసార్లు, శిలాజాలు, పురాతన ప్రపంచం వంటి విజ్ఞాన అంశాలను ఎంచుకోవడం ఆసక్తికరంగా మారింది.
ఇప్పటి పిల్లలు ఎక్కువ సమయం మొబైల్, సోషల్మీడియా, వీడియో కంటెంట్కే కేటాయిస్తున్న పరిస్థితుల్లో.. అదే డిజిటల్ వేదికను విజ్ఞానానికి ఉపయోగించాలనే ఆలోచన ఇందులో కనిపిస్తోంది. ముఖ్యంగా పిల్లల్లో సైన్స్, చరిత్ర, ప్రకృతి వైవిధ్యంపై ఆసక్తి పెంచే అంశాలను సరదాగా అందించే ప్రయత్నం కావడం విశేషం. వినోదంతో పాటు విజ్ఞానం కలిపి చెప్పే పాడ్కాస్ట్లు ప్రస్తుత తరం పిల్లలకు త్వరగా చేరువయ్యే అవకాశం ఉంది.
ఈ టీజర్లో మంత్రి నారా లోకేష్ కూడా కనిపించడం మరో ప్రత్యేకతగా మారింది. తండ్రి-కొడుకు మధ్య సహజమైన సంభాషణలా రూపొందించిన తీరు కుటుంబ అనుబంధాన్ని చూపించడమే కాకుండా.. యువతతో కనెక్ట్ అయ్యే ప్రయత్నంగా కూడా కనిపిస్తోంది. రాజకీయ నాయకుల కుటుంబ సభ్యులు ఇప్పుడు సంప్రదాయ వేదికలకే పరిమితం కాకుండా డిజిటల్ ప్రపంచాన్ని కూడా సమర్థంగా వినియోగించుకుంటున్నారనే సంకేతాలు ఇందులో కనిపిస్తున్నాయి.
ఇప్పటికే చదరంగంలో ప్రపంచ రికార్డు సాధించిన దేవాన్ష్.. ఇప్పుడు యూట్యూబ్ ద్వారా మరో రంగంలో తన ఆసక్తిని బయటపెడుతున్నాడు. అయితే ఇది కేవలం ఓ సెలబ్రిటీ కుటుంబానికి చెందిన బాలుడి యూట్యూబ్ ఛానల్గా మాత్రమే కాకుండా.. పిల్లల ఆసక్తులను ప్రోత్సహిస్తే వారు సృజనాత్మక దిశగా ఎలా ముందుకు వెళ్లగలరో చూపించే ఉదాహరణగా కూడా చూడవచ్చు.
