Gulte Telugu Telugu Political and Movie News Updates
తమిళ హీరో ధనుష్ కేవలం ప్రతిభావంతుడైన నటుడు మాత్రమే.. తనలో మంచి అభిరుచి ఉన్న దర్శకుడు, కథా రచయిత, లిరిసిస్ట్, సింగర్ కూడా ఉన్నారు. ఈ విభాగాలన్నింట్లో అతను టాలెంట్ చూపించాడు. ‘పవర్ పాండి’ అనే సినిమాతో దర్శకుడిగా శుభారంభం చేసిన అతను.. ఇటీవలే ‘రాయన్’ మూవీతో పెద్ద హిట్ కొట్టాడు.
ఈ ఊపులో ధనుష్ దర్శకుడిగా కొత్త సినిమాను అనౌన్స్ చేశాడు. ఆ సినిమా పేరు.. ఇడ్లి కడై (ఇడ్లి కొట్టు) కావడం విశేషం. ఇందులోనూ ధనుషే హీరో. తన సొంత స్క్రిప్టుతో డైరెక్షన్ కూడా చేస్తున్నాడు. ఈ సినిమా ప్రి లుక్ పొయెటిగ్గా కనిపిస్తోంది. ఆర్టిస్టులు ఎవరినీ చూపించకుండా తెల్లవారుజామున ఓ ఇడ్లి కొట్టును చూపించారు. ఇది చూస్తే ఈసారి ధనుష్ ఏదో ప్రయోగం చేయబోతున్నట్లే కనిపిస్తోంది.
డాన్ ఫిలిమ్స్ అనే కొత్త నిర్మాణ సంస్థ ఈ చిత్రాన్ని ప్రొడ్యూస్ చేస్తోంది. దర్శకుడిగా ధనుష్ తొలి సినిమా ‘పవర్ పాండి’ అందరినీ ఆశ్చర్యపరిచింది. మిడిలేజ్డ్ క్యారెక్టర్ ఆర్టిస్ట్ అయిన రాజ్ కిరణ్‌ను ప్రధాన పెట్టి హృద్యమైన సినిమా తీశాడు ధనుష్. అందులో ఆ పాత్రను యుక్త వయసులో ఉన్నపుడు తనే కనిపించాడు. రెండో సినిమాలో తనే హీరోగా నటిస్తూ ఫుల్ మాస్ చూపించాడు. ఈ సినిమా తమిళంలో కమర్షియల్‌గా కూడా పెద్ద సక్సెస్ అయింది.
ఇప్పుడు ధనుష్ దర్శకుడిగా పూర్తి భిన్నమైన దారిలో పయనించేట్లే కనిపిస్తున్నాడు. పేరు, ప్రి లుక్ చూస్తే అతను ‘కాకా ముట్టై’ తరహా అవార్డ్ మూవీ ఏమైనా ట్రై చేస్తున్నాడా అనిపిస్తోంది. ఈ చిత్రం వచ్చే ఏడాది విడుదలవుతుంది. ప్రస్తుతం ధనుష్ తెలుగు, తమిళ భాషల్లో శేఖర్ కమ్ముల దర్శకత్వంలో ‘కుబేర’ అనే సినిమా చేస్తున్న సంగతి తెలిసిందే. ఇందులో అక్కినేని నాగార్జున ప్రత్యేక పాత్ర పోషిస్తున్నారు.
