రెండు సందేహాలకు చెక్ పెట్టనున్న బన్నీ

వచ్చే నెల ఏప్రిల్ 8 ఐకాన్ స్టార్ అల్లు అర్జున్ పుట్టినరోజు. అభిమానులు చాలా ఎగ్జైటింగ్ గా ఎదురు చూస్తున్నారు. దానికి కారణం లేకపోలేదు. మీడియాలో, ఫ్యాన్స్ లో నెలకొన్న రెండు ముఖ్యమైన సందేహాలకు ఆ రోజు స్పష్టమైన సమాధానం దొరకబోతోంది కాబట్టి. మొదటిది పుష్ప 2 ది రూల్ విడుదల తేదీ. చాలా స్పష్టంగా ఆగస్ట్ 15 అని మైత్రి మేకర్స్ స్పష్టంగా చెబుతున్నప్పటికీ వాయిదా ప్రచారాలు ఆగడం లేదు. అందుకే ఒక స్పెషల్ టీజర్ తో పాటు రిలీజ్ డేట్ ని నొక్కి వక్కాణిస్తూ కొత్త కంటెంట్ ని వదులుతారని తెలిసింది. దీని కోసం పోస్టర్ల డిజైన్ కూడా జరుగుతోందని వినికిడి.

ఇక రెండోది పుష్ప తర్వాత ఎవరితో చేస్తాడనే మ్యాటర్. దర్శకుడు అట్లీతో ప్రాజెక్ట్ ఓకే అయ్యిందనే వార్త రెండు మూడు రోజులుగా చక్కర్లు కొడుతూనే ఉంది. పైగా స్టోరీ సిట్టింగ్స్ వీడియో బయటికి వచ్చింది. మరి త్రివిక్రమ్ శ్రీనివాస్ తో ప్లాన్ చేసుకున్న ప్యాన్ ఇండియా మూవీ సంగతేంటనేది తెలియాల్సి ఉంది. ఒకవేళ ఇది ఆలస్యమయ్యే పక్షంలో కనీసం ప్రొడక్షన్ హౌస్ నుంచి విషెస్ చెబుతూ ఒక పోస్టర్ లాంటిది వస్తే అనుమానాలు ఉండవు. పుష్ప 3 ది రోర్ గురించి మాత్రం ఎలాంటి అప్డేట్ ఉండకపోవచ్చు. అసలు మూడో భాగం ఉంటుందో లేదో అఫీషియల్ గా తెలిసే ఛాన్స్ ఇప్పట్లో లేదు.

పుష్ప 2 విడుదల సంవత్సరం కాబట్టి ప్రత్యేకంగా జరపాలని ఆయా యూనిట్లు ప్లాన్ చేసుకుంటున్నాయి. ప్రస్తుతం ఎడతెరిపి లేకుండా దీని షూటింగ్ లోనే బిజీగా ఉన్న బన్నీ ఆగస్ట్ తర్వాత ఓ నాలుగు నెలలు బ్రేక్ తీసుకుని కొత్త సినిమా సెట్లో అడుగు పెడతాడని సమాచారం. నాలుగేళ్లుగా ఒకే హెయిర్ స్టైల్ ని కొనసాగించి బాగా స్ట్రైన్ తీసుకున్న అల్లు అర్జున్ కొత్త మేకోవర్ కు మారిపోవాలంటే ఆ మాత్రం సమయం అవసరమే. అనిరుద్ రవిచందర్ సంగీతం సమకూర్చబోయే అట్లీ సినిమాకు సంబంధించిన క్యాస్టింగ్, టెక్నికల్ టీమ్ తదితర వివరాలు రాబోయే రోజుల్లో ఒక్కొక్కటిగా వెల్లడి కాబోతున్నాయి.