Gulte Telugu Telugu Political and Movie News Updates
బాహుబలి తర్వాత అసాధారణంగా పెరిగిపోయిన ప్రభాస్ ఇమేజ్ ను మ్యాచ్ చేసే సినిమాలు చేయడం చాలా కష్టంగా మారిపోయింది. ప్రభాస్ సినిమా అంటే అన్ని భారీగా ఉండాలని ఆలోచనతో.. టెక్నీషియన్లను, ముఖ్యంగా సంగీత దర్శకులను ఖరారు చేయడం ఒక సమస్యగా మారిపోయింది. సాహో సినిమాకు సంగీత దర్శకుడిని ఖరారు చేయడంలో ఎంత తాత్సారం చేశారో తెలిసిందే. బ్యాక్గ్రౌండ్ స్కోర్ ఒకరితో.. పాటలు వేర్వేరు మ్యూజిక్ డైరెక్టర్లతో చేయించుకున్నారు.
రాధేశ్యామ్ విషయంలో కూడా ఎంతో జాప్యం జరిగింది. చివరికి జస్టిన్ ప్రభాకరన్ తో పని కానిచ్చారు. కల్కి సినిమాకు ముందు మిక్కీ మేయర్ ను అనుకొని తర్వాత.. నారాయణన్ ను ఎంచుకోవడం తెలిసిందే.
ఇప్పుడిక ప్రభాస్ కొత్త సినిమా సంగీత దర్శకుడి విషయంలో ఆసక్తికర చర్చ జరుగుతోంది. సీతారామం దర్శకుడు హను రాఘవపూడి.. ప్రభాస్ తో ఓ సినిమా చేయబోతున్న సంగతి తెలిసిందే. ఈ చిత్రానికి తన ఫేవరెట్ మ్యూజిక్ డైరెక్టర్ విశాల్ చంద్రశేఖర్ ను హను ఓకే చేసినట్లుగా తెలుస్తోంది. విశాల్ మంచి అభిరుచి ఉన్న సంగీత దర్శకుడు అనడంలో సందేహం లేదు. ప్రభాస్ తో సినిమా తీసే నిర్మాతల ఆలోచన వేరుగా ఉంటోంది. చిన్న, మిడ్ రేంజ్ మ్యూజిక్ డైరెక్టర్లు ప్రభాస్ ఇమేజ్ ను మ్యాచ్ చేసే సంగీతం ఇవ్వలేరన్న ఒక భ్రమలో ఉంటున్నారు.
తనకెంతో నచ్చిన మిక్కిని నాగ్ అశ్విన్ కల్కి కోసం పక్కన పెట్టడం ఇందుకు ఒక ఉదాహరణ. ఈ నేపథ్యంలో విశాల్ అయినా హను సినిమాకు కొనసాగుతాడా లేదంటే చివర్లో మళ్ళీ మార్పు జరుగుతుందా అన్నది చర్చనీయాంశంగా మారింది. హను దర్శకత్వంలో వచ్చిన కృష్ణగాడి వీర ప్రేమ గాథ, సీతారామం చిత్రాలకు విశాల్ అద్భుతమైన సంగీతం అందించిన సంగతి తెలిసిందే. అవి మ్యూజికల్ గా పెద్ద హిట్ అయ్యాయి.
