Gulte Telugu Telugu Political and Movie News Updates
తెలుగు రియాలిటీ షోలలో ఒక కొత్త ట్రెండ్ కు శ్రీకారం చుట్టేందుకు ప్రయత్నించిన వాటిలో బిగ్ బాస్ ఒకటి. వివాదాలే కేంద్రంగా నడిచే ఈ ఆటకు మొదట జూనియర్ ఎన్టీఆర్, నానిలు హోస్ట్ గా పని చేశారు. ఆ ఇద్దరూ తర్వాత కొనసాగేందుకు ఇష్టపడలేదు. అక్కడి నుంచి ఇది నాగార్జున చేతికి వచ్చాక సక్సెస్ ఫుల్ గా మరో నాలుగు సీజన్లు నడిపించారు. రేటింగ్స్ పరంగా వంద రోజుల ఈ గేమ్ షో అద్భుతాలు చేయకపోయినా ఫినాలే వచ్చేనాటికి హాట్ టాపిక్ గా నిలుస్తున్న మాట వాస్తవం. ఇప్పుడీ సిరీస్ ఏడో భాగానికి రంగం సిద్ధమవుతోంది. పార్టిసిపెంట్స్ లిస్టు లీకుల రూపంలో వస్తోంది.
దాని ప్రకారం ఈసారి టివి స్టార్ యాక్టర్ ప్రభాకర్, యాంకర్ నిఖిల్ , నృత్య దర్శకుడు ఢీ పండు, గాయని మోహన భోగరాజు, టిక్ టాక్ ద్వారా పాపులరైన దుర్గారావు జంట, నటి విష్ణుప్రియ భీమినేని, హీరో సాయిరోనక్, నటి శోభా శెట్టి, జబర్దస్త్ వర్షలతో ఒప్పందాలు జరిగిపోయాయని తెలిసింది. మొత్తం 21 సభ్యుల్లో బయటికి వచ్చిన పేర్లు పది మాత్రమే. మిగిలినవి కూడా మరికొద్ది రోజుల్లో రివీల్ కావొచ్చు. అగ్రిమెంట్లు కొంత ఆలస్యమవుతున్నందున స్టార్ మా ఛానల్ సైతం ఎప్పటి నుంచి మొదలుపెట్టేది చెప్పడం లేదు. సెప్టెంబర్ మొదటి వారాన్ని ప్రస్తుతానికి టార్గెట్ గా పెట్టుకున్నారు.
టీవీ షోలకు సెన్సార్ ఉండాల్సిందేననే కోర్టు వ్యాఖ్యానించి బిగ్ బాస్ టీమ్ కి నోటీసులు పంపిన నేపథ్యంలో రాబోయే పరిణామాలను బట్టి షో స్వరూపం మార్పులకు గురయ్యే అవకాశం లేకపోలేదు. నాగార్జున ఇటీవలే సీజన్ 7 ముందస్తు ప్రిపరేషన్ కోసం పాత విజేతలతో ఒక స్పెషల్ ఎపిసోడ్ చేశారు. అసలు గేమ్ మొదలయ్యాక వీకెండ్ షెడ్యూల్స్ ని దానికి అనుగుణంగా మార్చుకుంటారు. గత రెండు సీజన్లు ఆశించిన స్థాయిలో స్పందన దక్కించుకోకపోవడంతో ఈసారి మరింత మసాలా, కాంట్రావర్సీలు ప్లాన్ చేస్తున్నట్టు ఇన్ సైడ్ టాక్. ఎంత మేరకు అవి సాధ్యమవుతాయో వేచి చూడాలి.
