సితార చేతికి లియో: రిస్కులు లాభాలు

టాలీవుడ్ టాప్ బ్యానర్లలో ఒకటిగా ఇప్పటికే దూసుకుపోతున్న సితార ఎంటర్ టైన్మెంట్స్ తాజాగా డిస్ట్రిబ్యూషన్ లోకి అడుగు పెట్టింది. విజయ్ నటిస్తున్న లియోని కొనుగోలు చేసి ఆ విషయాన్ని అధికారికంగా ప్రకటించింది. ఎంత మొత్తానికి అనేది బయట పెట్టలేదు కానీ ఇన్ సైడ్ టాక్ ప్రకారం 21 కోట్ల దాకా ఉండొచ్చని తెలిసింది. ఇప్పటిదాకా విజయ్ కి ఇంత రేట్ తెలుగులో రాలేదు. ఒక డబ్బింగ్ మూవీ అందులోనూ హీరో కనీసం ప్రమోషన్లకు హైదరాబాద్ లో ఏనాడూ కాలు పెట్టని తరుణంలో  ఈ రేంజ్ డిమాండ్ అంటే మార్కెట్ ఎంతగా పెరిగిందో అర్థం చేసుకోవచ్చు.

ఇంత పెట్టుబడికి కారణం లేకపోలేదు. ఇక్కడ విజయ్ తో సమానంగా దర్శకుడు లోకేష్ కనగరాజ్ ట్రాక్ రికార్డు పని చేస్తోంది. ఖైదీ విపరీత లాభాలు ఇచ్చింది. కమల్ హాసన్ విక్రమ్ దాన్ని పంపిణి చేసిన నితిన్ ఫ్యామిలీకి కనక వర్షం కురిపించింది. దీంతో సహజంగానే అతనికి ఫాలోయర్స్ పెరిగిపోయారు. అందులోనూ భవిష్యత్తులో రామ్ చరణ్, ప్రభాస్ లతో సినిమాలు చేయొచ్చనే ప్రచారం ఈ మధ్య ఊపందుకుంది. ఇక విజయ్ చేసే కంటెంట్ ఎంత రొటీన్ గా ఉన్నా మాస్ ఆడియన్స్ లో తన పట్టు బాగుంది. వారసుడు సీరియల్ లా ఉన్నా డబ్బులు తెచ్చింది.

కొన్ని కోణాల్లో సితారకు రిస్క్ లేకపోలేదు. దసరాకే బాలకృష్ణ భగవంత్ కేసరి వస్తోంది. రవితేజ టైగర్ నాగేశ్వరరావు ప్రకటన ఇచ్చింది. వీటిని ఫేస్ చేయడం అంత సులభం కాదు. గుంటూరు కారం లాంటి భారీ ప్రాజెక్టు చేతిలో ఉంది కాబట్టి దాని కోసమైనా కొంచెం రేట్ అటు ఇటుగా డిమాండ్ చేసినా సితార అడిగిన లియో రేట్లకు బయ్యర్లు ఎస్ అంటారు. కాకపోతే పెట్టుబడి మొత్తాన్ని వెనక్కు తేవాలంటే భారీ బ్లాక్ బస్టర్ టాక్ తప్పనిసరి. ఒక పెద్ద స్టార్ హీరో క్యామియో ఉందనే ప్రచారం కూడా ఢిమాండ్ కి కారణం అయ్యింది. ఒకవేళ లియో కనక వర్కౌట్ అయితే టాలీవుడ్ లో విజయ్ రేంజ్ మరింత పెరగడం ఖాయం.