సమ్మర్ ముగిసింది.. నిరాశే మిగిలింది

టాలీవుడ్లో షార్ట్ సీజన్ల వరకు సంక్రాంతి బిగ్గెస్ట్ సీజన్ అయితే.. వేసవి అనేది దీర్ఘ కాలం పాటు బాక్సాఫీస్‌కు కాసుల వర్షం కురిపించే సీజన్. ఈ టైంలో పెద్ద హీరోలు నటించిన భారీ చిత్రాలు కనీసం మూడు నాలుగు అయినా రిలీజవుతుంటాయి. గత ఏడాది అయితే రాధేశ్యామ్, ఆర్ఆర్ఆర్, కేజీఎఫ్-2, ఆచార్య, సర్కారు వారి పాట, ఎఫ్-2 లాంటి పెద్ద సినిమాలు ఈ సీజన్లోనే సందడి చేశాయి.

కానీ ఈ ఏడాది వేసవికి పెద్ద సినిమాల సందడే లేకపోయింది. టాప్ స్టార్లు నటించిన ఒక్క సినిమా కూడా రిలీజ్ కాలేదు. అదే అత్యంత నిరాశ కలిగించే విషయం అయితే.. గత రెండు నెలల్లో రిలీజైన మిడ్ రేంజ్ సినిమాల్లో సందడి చేసినవి తక్కువ కావడం మరింత నిరాశ పరిచేదే. క్రేజీ సీజన్లో బాక్సాఫీస్‌ను పూర్తిగా క్యాష్ చేసుకున్న సినిమాలు కేవలం రెండు మాత్రమే.

నేచురల్ స్టార్ నాని నటించిన ‘దసరా’ మార్చి 30న రిలీజై బాక్సాఫీస్‌ను కళకళలాడించింది. ఆ సినిమాకు కొంచెం డివైడ్ టాక్ వచ్చినా తట్టుకుని నిలబడింది. పెద్ద సినిమాలకు దగ్గరగా ఈ చిత్రం ఓపెనింగ్స్ తెచ్చుకుంది. కాకపోతే సినిమాకు లాంగ్ రన్ లేకపోయింది. వేసవిలో ఎక్కువ వారాలు సందడి చేసిన సినిమా అంటే.. విరూపాక్షనే అని చెప్పాలి. ఈ సినిమా డల్ నోట్‌తో మొదలైనప్పటికీ.. టాక్ బాగుండటంతో బలంగా పుంజుకుంది.

నెల రోజుల పాటు బాక్సాఫీస్ దగ్గర మంచి వసూళ్లు రాబట్టి.. పెట్టుబడి-రాబడి కోణంలో సమ్మర్లో బిగ్గెస్ట్ హిట్‌గా నిలిచింది. ఇవి కాకుండా మిడ్ రేంజ్ సినిమాలన్నీ తుస్సుమనిపించాయి. ఏజెంట్ సమ్మర్లో బిగ్గెస్ట్ డిజాస్టర్‌గా నిలవగా.. రామబాణం, రావణాసుర, శాకుంతలం, కస్టడీ లాంటి పేరున్న చిత్రాలు బాక్సాఫీస్ దగ్గర ఘోరంగా దెబ్బ తిన్నాయి.అనువాద చిత్రాల్లో బిచ్చగాడు-2, 2018, విడుదల ఆకట్టుకున్నాయి.

మిగతా సినిమాలన్నీ కూడా తీవ్ర నిరాశకు గురి చేశాయి. ‘అన్నీ మంచి శకునములే’, ‘రంగమార్తాండ’ మంచి సినిమాలుగా పేరు తెచ్చుకున్నా వసూళ్లు రాబట్టలేకపోయింది. ‘ఉగ్రం’, ‘మేమ్ ఫేమస్’ ఓ మోస్తరుగా వసూళ్లు రాబట్టాయి. ‘మీటర్’, ‘మళ్ళీ పెళ్ళి’ లాంటి సినిమాల గురించి మాట్లాడుకోవడం కూడా వేస్ట్ అన్నట్లు తయారైంది పరిస్థితి. ఈ వారం రిలీజైన అహింస, నేను స్టూడెంట్ సర్, పరేషాన్ చిత్రాలు కూడా నెగెటివ్ టాక్‌తోనే మొదలై.. వేసవికి పేలవమైన ముగింపునిచ్చాయి.