Gulte Telugu Telugu Political and Movie News Updates
ఈ సంక్రాంతికి వాల్తేరు వీరయ్య, వీరసింహారెడ్డి చిత్రాలు రిలీజవ్వడానికి కొన్ని నెలల ముందు నుంచే చిరంజీవి, బాలకృష్ణ అభిమానుల మధ్య చిచ్చు రేగిన సంగతి తెలిసిందే. ఈ రెండు చిత్రాల్లో దేనిది ఆధిపత్యం అనే విషయంలో సోషల్ మీడియా వేదికగా నెలల తరబడి కొట్టుకున్నారు. ఇక రిలీజ్ తర్వాత అయితే ఆ వార్ పీక్స్‌కు చేరింది.
చివరికి చూస్తే వసూళ్ల పరంగా ‘వీరసింహారెడ్డి’ మీద ‘వాల్తేరు వీరయ్య’ స్పష్టమైన పైచేయి సాధించింది. ఆ సమయంలో చిరు అభిమానులు కాలర్ ఎగరేస్తే.. బాలయ్య ఫ్యాన్స్ కొంచెం వెనక్కి తగ్గారు. ఐతే ఆ గొడవ ఎప్పుడో సద్దుమణిగిందిలే అనుకుంటే.. ఇప్పుడు మళ్లీ కొత్త రచ్చ మొదలవడం చర్చనీయాంశం అయింది. ‘వీరసింహారెడ్డి’ వంద రోజుల ప్రదర్శన పూర్తి చేసుకున్న సందర్భంగా హైదరాబాద్ సిటీలో వెలసిన పోస్టర్లు ఈ రచ్చకు కారణం అయ్యాయి. ఈ పోస్టర్ మీద ‘100 డేస్ విత్ సింగిల్ హ్యాండ్’ అని వేయడం దుమారం రేపింది.
‘వాల్తేరు వీరయ్య’ సినిమాలో చిరంజీవే లీడ్ హీరో అయినా.. రవితేజ ముఖ్య పాత్ర పోషించాడు. ఈ నేపథ్యంలో దాన్ని మల్టీస్టారర్‌గా పేర్కొంటూ.. ఆ సక్సెస్ క్రెడిట్‌ను రవితేజకు కూడా షేర్ చేస్తున్నారు బాలయ్య ఫ్యాన్స్. చిరు.. రవితేజ సపోర్ట్‌తోనే బిగ్ హిట్ కొట్టాడని.. కానీ బాలయ్య సోలోగా ‘వీరసింహారెడ్డి’ని సక్సెస్ చేశాడని.. అందుకే ఆయనే గ్రేట్ అనే రకంగా ఫీలవుతున్నారు.
ఈ ఉద్దేశంతోనే ఇలా పోస్టర్లు వేశారు. ఐతే ఇక్కడ గమనించాల్సిన విషయం ఏంటంటే.. ‘వాల్తేరు వీరయ్య’, ‘వీరసింహారెడ్డి’ చిత్రాలను నిర్మించింది ఒకే నిర్మాణ సంస్థ.. మైత్రీ మూవీ మేకర్స్. వాళ్లు రిలీజ్ టైంలో ఈ గొడవలు తగ్గించేందుకు చేయాల్సిందంతా చేశారు. అయినా ఫ్యాన్స్ తగ్గలేదు. ఇప్పుడు మైత్రీ వారు ఇన్‌కమ్ ట్యాక్స్ గొడవల్లో ఉండగా.. బాలయ్య అభిమానులే చొరవ తీసుకుని ఇలా పోస్టర్లు వేసి ఉంటారని భావిస్తున్నారు. ఈ పోస్టర్లను సిటీలో చిరు ఫ్యాన్స్ అక్కడక్కడా చించి పడేస్తుండటం గమనార్హం.
