Gulte Telugu Telugu Political and Movie News Updates
పిల్లలు పుట్టినప్పటి కంటే వాళ్లు ప్రయోజకులైనపుడు తల్లిదండ్రులు ఎక్కువ ఆనంద పడాలని అంటారు. ఐతే కొంతమంది పిల్లలుగా ఉండగానే తల్లిదండ్రులు గర్వించేలా, పొంగిపోయేలా చేస్తారు. అల్లు అర్జున్ కూతురు అర్హ విషయంలో ‘గర్వించడం’ లాంటి పెద్ద పదాలు వాడలేం కానీ.. తన తల్లిదండ్రులు ఉబ్బితబ్బిబ్బయ్యేలా మాత్రం చేస్తోందట ఆ చిన్నారి. బన్నీ పెట్టే క్యూట్ ఫొటోలు, వీడియోలతో ఇప్పటికే నెటిజన్ల దృష్టిని బాగా ఆకర్షించిన అర్హ.. ఇప్పుడు తొలిసారిగా వెండితెరపై మెరవబోతోంది.
‘శాకుంతలం’తో అర్హ బాల నటిగా పరిచయం అవుతున్న సంగతి తెలిసిందే. ట్రైలర్లో సింహం మీద వస్తున్న దృశ్యంలో చాలా ముద్దుగా కనిపించి ఆకట్టుకున్న అర్హ.. సినిమాలో తనదైన స్క్రీన్ ప్రెజెన్స్‌తో మెస్మరైజ్ చేయబోతున్నట్లు సమాచారం. సోమవారం రాత్రి ప్రసాద్ ఐమాక్స్‌లో ‘శాకుంతలం’ స్పెషల్ త్రీడీ ప్రిమియర్ వేశారు.
ఇండస్ట్రీ, మీడియా నుంచి ప్రత్యేక అతిథులను పిలిచి ఈ షో వేశారు. ఓవరాల్‌గా సినిమా ఎలా ఉందన్న టాక్ బయటికి రాలేదు కానీ.. ఈ షో చూసిన వాళ్లందరూ ముక్త కంఠంతో చెబుతున్న అల్లు అర్హ సూపర్ అని. ఇందులో దుష్యంతుడి కొడుకు పాత్రలో అర్హ కనిపించనుందట. కెమెరా ముందు ఏమాత్రం తడబడకుండా, బెరుకు లేకుండా అర్హ నటించిందని.. డైలాగులు చాలా బాగా చెప్పిందని.. క్యూట్‌నెస్ ఓవర్ లోడెడ్ అనిపించేలా తన ఎపిసోడ్ ఉందని షో చూసిన వాళ్లు చెబుతున్నారు. అర్హ కనిపించింతసేపు ఎవ్వరూ చూపు తిప్పుకోలేరని అంటున్నారు. సినిమాకు మేజర్ హైలైట్లలో ఈ ఎపిసోడ్ ఒకటిగా చెబుతున్నారు.
ఈ షో అయ్యాక చాలామంది బన్నీకి కాల్స్, మెసేజ్ చేసి అర్హ పెర్ఫామెన్స్ గురించి పొగిడారని.. ఫీడ్ బ్యాక్ అంతా తనకు వెళ్లిందని.. దీంతో అల్లు హీరో ఆనందంతో పొంగిపోయాడని సన్నిహితుల సమాచారం. ఈ నెల 14న సినిమా చూడబోతున్న ప్రేక్షకులందరూ కూడా అర్హను కొనియాడటం ఖాయమని, అప్పుడు బన్నీ ఆనందం రెట్టింపవుతుందని అంటున్నారు.
