వాల్తేరు వీర‌య్య పేరు వెనుక క‌థ‌

వాల్తేరు వీర‌య్య‌.. సంక్రాంతి పండ‌క్కి రాబోతున్న మెగాస్టార్ చిరంజీవి కొత్త సినిమా. చిరంజీవి రెండో ఇన్నింగ్స్‌లో బెస్ట్ టైటిల్‌తో వ‌చ్చిన సినిమాగా దీన్ని చెప్పొచ్చు. చాలా క్యాచీగా ఉండే టైటిల్ పెట్టాడు చిరు అభిమాని అయిన ద‌ర్శ‌కుడు బాబీ. మాస్‌లోకి ఈ టైటిల్ చాలా ఈజీగా వెళ్లిపోయింది. సినిమాకు పెద్ద ఆక‌ర్ష‌ణ‌గా నిలిచింది.

ఐతే ఈ రోజుల్లో వీర‌య్య అనే పాత క‌లం పేరుతో ఓ పెద్ద హీరో సినిమా చేయ‌డం అరుదే. మ‌రి ప‌ర్టికుల‌ర్‌గా హీరో పేరును ఇలా పెట్ట‌డానికి కార‌ణం ఏంటి అంటే.. దీని వెనుక ఆస‌క్తిక‌ర క‌థ ఉంద‌ని చెప్పాడు బాబీ. వాల్తేరు వీర‌య్య ప్ర‌మోష‌న్ల‌లో భాగంగా మీడియా ఇంట‌ర్వ్యూల్లో బాబీ ఈ విష‌యం వెల్ల‌డించాడు.

వెంకీ మామ షూటింగ్ జ‌రుగుతున్నపుడు అందులో ముఖ్య పాత్ర పోషించిన నాజ‌ర్ గారు నాకో పుస్త‌కం ఇచ్చారు. అందులో వీర‌య్య అనే క్యారెక్ట‌ర్ పేరు న‌న్నెంతో ఆకట్టుకుంది. అప్పుడే ఆ టైటిల్‌తో సినిమా చేయాల‌ని నా టీంతో చెప్పాను.

ఇదిలా ఉంటే చిరంజీవి గారికి వీర‌య్య అనే పేరుతో ప్ర‌త్యేక అనుబంధం ఉంది. ఆయ‌న సినిమాల్లోకి రాక‌ముందు చిరంజీవి గారి నాన్న‌గారి స‌హోద్యోగి అయిన ఓ హెడ్ కానిస్టేబుల్ 500 రూపాయ‌లిచ్చి ఫొటో షూట్ చేయించార‌ట‌. ఆ ఫొటోలు ప‌ట్టుకునే చిరంజీవి గారు మ‌ద్రాస్‌కు వెళ్లారు. ఆ కానిస్టేబుల్ పేరు వీర‌య్య అని నాకు తెలిసింది. అది నోస్టాల్జిక్‌గా అనిపించి, నేను అప్ప‌టికే ఫిక్స‌యిన వీర‌య్య టైటిల్‌తోనే చిరంజీవి గారితో సినిమా చేయాల‌ని ఫిక్స‌య్యాను. చిరంజీవి గారికి కూడా ఈ టైటిల్ బాగా న‌చ్చింది. సినిమా క‌థ వాల్తేరు చుట్టూ తిరుగుతుంది కాబ‌ట్టి దాన్ని కూడా టైటిల్లో యాడ్ చేశాం. ఒక అభిమానిగా, మాస్ ప్రేక్ష‌కులు చిరంజీవి గారి నుంచి ఏం కోరుకుంటారో అవ‌న్నీ ఉండేలా ఈ సినిమాను తీర్చిదిద్దాను. క‌చ్చితంగా అభిమానుల అంచ‌నాల‌ను అందుకుంటా అని బాబీ తెలిపాడు.