మాచర్ల మీద కొత్త ఒత్తిడి

వచ్చే వారం విడుదల కాబోతున్న మాచర్ల నియోజకవర్గం మీద ఇప్పటికైతే గొప్పగా చెప్పుకునేంత హైప్ కానీ అంచనాలు కానీ లేవు. అంజలితో చేసిన ఐటెం సాంగ్ చార్ట్ బస్టర్ కావడంతో మాస్ లో దీని గురించి బజ్ పెరిగింది కానీ ట్రైలర్ ఎన్ని మిలియన్ల వ్యూస్ తెచ్చుకున్నా బయట వాతావరణం దానికి భిన్నంగా ఉంది.

ముఖ్యంగా రెగ్యులర్ కమర్షియల్ ఎలిమెంట్స్ తో మాచర్లని తీర్చిదిద్దినట్టుగా ఇచ్చిన ఇంప్రెషన్ క్లాస్ ఆడియన్స్ ని ఏ మేరకు ఆకట్టుకుందో చెప్పడం కష్టం. అందుకే ప్రమోషన్ ని కొత్త రూట్లో తీసుకెళ్లడం అవసరం. యూనిట్ తనవంతు బాధ్యతగా ఇంటర్వ్యూలు గట్రా మొదలుపెట్టింది కానీ ఇంకేదో మిస్ అవుతోందనే ఫీలింగ్ అయితే ఫ్యాన్స్ లో లేకపోలేదు. కారణాలున్నాయి.

సరిగ్గా వారం ముందు వచ్చిన బింబిసార, సీతారామంలు వాటిలో గ్రాండియర్ ప్లస్ కంటెంట్ తో ఆడియన్స్ మెప్పు పొందాయి. ఆర్ఆర్ఆర్, కెజిఎఫ్, విక్రమ్, మేజర్ తర్వాత ఆ స్థాయిలో రెస్పాన్స్ వచ్చింది వీటికే. మాచర్ల నియోజకవర్గంలో అలాంటి ఫ్యాక్టర్స్ లేవు. మరి నితిన్ మూవీలో స్పెషల్ ఏముందనే అభిప్రాయాన్ని జనంలోకి బలంగా తీసుకెళ్లాలి.

అసలే కార్తికేయ 2ని తక్కువ అంచనా వేయడానికి లేదు. మరోవైపు లాల్ సింగ్ చడ్డాని హిందీ సినిమా కదా పోటీ కాదని సరిపుచ్చుకున్నా నగరాల్లోని మల్టీ ప్లెక్స్ సెగ్మెంట్ మీద దాని ప్రభావం చాలా బలంగా ఉంటుంది. అందుకే మాచర్ల బృందం 12న ఓపెనింగ్స్ కోసం గట్టిగానే కష్టపడాల్సి ఉంటుంది. కొద్దిరోజుల క్రితం తన పాత ట్వీట్ల వల్ల అనవసరమైన వివాదంలో లాగబడ్డ దర్శకుడు ఎంఎస్ రాజశేఖర్ రెడ్డికి డెబ్యూ మూవీ ఇది. కృతి శెట్టి గ్లామర్ మరో ఆకర్షణ కాగా ఊర మాస్ ఐఎఎస్ ఆఫీసర్ గా నితిన్ ఇందులో కొత్తగా కనిపించబోతున్నాడు.