Gulte Telugu
నందమూరి హీరో కళ్యాణ్ రామ్ ఎప్పుడూ కొత్త దర్శకులను ఎంకరేజ్ చేస్తూ వాళ్ళతో సినిమాలు చేస్తుంటాడు. సురేందర్ రెడ్డి , అనీల్ రావిపూడి , గుహన్ వంటి దర్శకులను పరిచయం చేసిన ఘనత కళ్యాణ్ రామ్ దే. ఇప్పుడు తన బేనర్ ద్వారా మరో దర్శకుడిని పరిచయం చేస్తున్నాడు కళ్యాణ్ రామ్. కళ్యాణ్ రామ్ హీరోగా ‘బింబిసార’ అనే పీరియాడిక్ ఫాంటసీ సినిమా రాబోతుంది. తాజాగా ట్రైలర్ కూడా రిలీజ్ చేశారు. ఈ సినిమాతో వసిష్ట్ అనే కుర్రాడు దర్శకుడిగా పరిచయం అవుతున్నాడు.
అయితే ఈ దర్శకుడికి మరో బంపర్ ఆఫర్ ఇవ్వడానికి రెడీ అవుతున్నాడట కళ్యాణ్ రామ్. ఇటివలే ఎన్టీఆర్ కోసం వసిష్ట్ కళ్యాణ్ రామ్ కి ఓ స్క్రిప్ట్ వినిపించాడట. స్టోరీ నచ్చడంతో త్వరలోనే తారక్ తో ఆ సినిమా చేసే ఆలోచనలో ఉన్నాడు కళ్యాణ్ రామ్. ఈ విషయాన్ని తాజాగా బింబిసార ఈవెంట్ లో స్వయంగా చెప్పుకున్నాడు. ‘బింబిసార’ ని నాలుగు భాగాలుగా తీసి ఓ ఫ్రాంచైజీ లా చేస్తానని కళ్యాణ్ రామ్ ప్రకటించాడు. వచ్చే ఏడాది రెండో పార్ట్ రిలీజ్ అంటుంది అన్నాడు. దాంతో రెండో భాగంలో ఎన్టీఆర్ ఏమైనా నటించే అవకాశం ఉందా ? అనే ప్రశ్న మీడియా నుండి కళ్యాణ్ రామ్ కి ఎదురైంది.
దానికి బదులు చెప్పడానికి చాలా టైం తీసుకున్నాడు నందమూరి హీరో. నాలుగు రోజుల క్రితమే వసిష్ట్ , నేను తారక్ కోసం ఓ కథ అనుకున్నామని త్వరలోనే ఆ ప్రాజెక్ట్ సెట్ అవ్వొచ్చని తెలిపాడు. దీంతో కుర్ర డైరెక్టర్ రెండో సినిమాకి ఎన్టీఆర్ ని అప్పజెప్పే ప్లానింగ్ లో కళ్యాణ్ రామ్ ఉన్నట్లు స్పష్టమైంది. ‘బింబిసార’ భారీ హిట్టయితే తారక్ తో వసిష్ట్ సినిమా ఈజీగా పట్టలెక్కేస్తుంది. అన్ని కుదిరితే కొరటాల , ప్రశాంత్ నీల్ తర్వాత ఎన్టీఆర్ ,వసిష్ట్ సినిమా ఉండొచ్చు.
