బాల‌య్య‌తో అనిల్.. వేరే లెవెల్‌

య‌న్.టి.ఆర్, రూల‌ర్ సినిమాల‌తో బాగా డౌన్ అయిన‌ట్లు క‌నిపించిన సీనియ‌ర్ హీరో నంద‌మూరి బాల‌కృష్ణ.. అఖండ‌తో భ‌లేగా పుంజుకున్నాడు. ఆ ఊపు త‌గ్గ‌నివ్వ‌కుండా.. త‌ర్వాత క్రేజీ ప్రాజెక్టులు లైన్లో పెడుతున్నాడాయ‌న‌. క్రాక్‌తో బ్లాక్‌బ‌స్ట‌ర్ కొట్టిన గోపీచంద్ మ‌లినేనితో ఓ సినిమా చేస్తున్న బాల‌య్య‌..

దీని త‌ర్వాత వ‌రుస విజ‌యాల‌తో దూసుకెళ్తున్న అనిల్ రావిపూడితో జ‌ట్టు క‌ట్ట‌బోతున్న సంగ‌తి తెలిసిందే. ఈ సినిమా ఈ ఏడాది చివ‌ర్లోనే ప‌ట్టాలెక్కుతుంద‌ని అనిల్ ఆల్రెడీ వెల్ల‌డించడం విదిత‌మే. కాగా ఓ ఇంట‌ర్వ్యూలో ఈ ప్రాజెక్టు గురించి క్రేజీ కామెంట్లు చేశాడు అనిల్. ఈ సినిమా విష‌యంలో తాను పిచ్చ ఎగ్జైటెడ్‌గా ఉన్న‌ట్లు చెప్పిన అనిల్.. తాను ఇప్ప‌టిదాకా చేసిన సినిమాల‌న్నింటి కంటే భిన్నంగా ఈ చిత్రం ఉండ‌బోతోంద‌ని తెలిపాడు.

కామెడీ, ఎంట‌ర్టైన్మెంట్ త‌న ప్ర‌ధాన బ‌లాల‌ని.. కానీ వాటిని బాల‌య్య సినిమాకు దాదాపుగా ప‌క్క‌న పెట్ట‌బోతున్న‌ట్లుగా అనిల్ తెలిపాడు. కొంచెం కామెడీ ట‌చ్ ఉన్న‌ప్ప‌టికీ.. తాను ఇప్ప‌టిదాకా చేసిన సినిమాల మాదిరి పూర్తిగా ఎంట‌ర్టైన్మెంట్ స్ట‌యిల్లో ఈ సినిమా ఉండ‌ద‌ని, బాల‌య్య‌తో సినిమా అంటే అలా చేయ‌డం కూడా బాగుండ‌ద‌ని అనిల్ అభిప్రాయ‌ప‌డ్డాడు. ఈ సినిమా కోసం తాను ఒక కొత్త ప్ర‌యోగం చేస్తున్నానని.. అదేంటో త‌న‌కు మాత్ర‌మే తెలుసు కాబ‌ట్టి చాలా ఎగ్జైటెడ్‌గా ఉన్నాన‌ని.. త‌న కెరీర్లో బెస్ట్ వ‌ర్క్‌గా బాల‌య్య సినిమా నిలుస్తుంద‌ని న‌మ్ముతున్నాన‌ని అనిల్ చెప్పాడు.

పోకిరి, గ‌బ్బ‌ర్ సింగ్, అర్జున్ రెడ్డి త‌ర‌హాలో పూర్తిగా హీరో క్యారెక్ట‌రైజేష‌న్ మీద న‌డిచే సినిమా ఇద‌ని.. ఇలాంటి వాటికి బాక్సాఫీస్ ద‌గ్గ‌ర అద్భుతాలు జ‌రుగుతాయ‌ని.. త‌న సినిమాలో బాల‌య్య 45 ఏళ్ల న‌డి వ‌య‌స్కుడి పాత్ర‌లో క‌నిపిస్తార‌ని.. ఆయ‌న త‌న‌యురాలిగా శ్రీ లీల న‌టిస్తుంద‌ని వెల్ల‌డించాడు అనిల్. మొత్తంగా అనిల్ మాట‌లు చూస్తే ఈ సినిమా వేరే లెవెల్లో ఉండ‌బోతోంద‌ని అభిమానులు ఎగ్జైట్ అవుతున్నారు.