రాకీ భాయ్ వారంలో ఎంత కొల్లగొట్టాడు?

ఇండియాలో బాహుబలి-2 తర్వాత ఆ స్థాయి అంచనాలతో విడుదలైన చిత్రం కేజీఎఫ్-2. మేకింగ్ దశలో ఉండగా ఏమో అనుకున్నారు కానీ.. రిలీజ్ ముంగిట దీనికి వచ్చిన హైప్ అంతా ఇంతా కాదు. కాబట్టే టాక్ కొంచెం అటు ఇటుగా ఉన్నప్పటికీ వసూళ్ల మోత మోగించేసిందీ చిత్రం. ట్రేడ్ పండిట్ల అంచనాలను మించిపోయిన ఈ చిత్రం వారం రోజుల వ్యవధిలో వరల్డ్ వైడ్ ఏకంగా రూ.720 కోట్ల దాకా గ్రాస్ కలెక్షన్లు కొల్లగొట్టడం విశేషం.

తొలి వారం వసూళ్లలో ‘బాహుబలి-2’ తర్వాతి స్థానం ‘కేజీఎఫ్-2’దే. రాజమౌళి సినిమా ‘ఆర్ఆర్ఆర్’ను మించి ఫస్ట్ వీక్ ఈ సినిమా కలెక్షన్లు రాబట్టడం విశేషం. మిగతా అన్ని ఏరియాల్లో ‘ఆర్ఆర్ఆర్’దే ఆధిపత్యం కానీ.. హిందీ మార్కెట్లో ‘కేజీఎఫ్-2’ దాంతో పోలిస్తే అసాధారణమైన వసూళ్లు రాబట్టడంతో ఇది రాజమౌళి సినిమాను మించిపోయింది. ఇండియాలో ‘కేజీఎఫ్-2’ హిందీ వెర్షన్ ఏడు రోజుల్లో ఏకంగా రూ.300 కోట్లు కొల్లగొట్టడం విశేషం. ‘కేజీఎఫ్-2’ తెలుగు వెర్షన్ రెండు తెలుగు రాష్ట్రాల్లో కలిపి వారం రోజుల్లో రూ.96 కోట్ల గ్రాస్ రూ.65 కోట్ల షేర్ వసూలు చేయడం విశేషం.

తెలుగులో ఈ చిత్రం బ్రేక్ ఈవెన్ మార్కుకు దగ్గరగా ఉంది. కర్ణాకటలో ఈ కన్నడ చిత్రం రూ.125 కోట్ల గ్రాస్.. రూ.75 కోట్ల షేర్ రాబట్టింది. ఓవరాల్‌గా ఇండియా వరకే ‘కేజీఎఫ్-2’ రూ.600 కోట్లకు చేరువగా గ్రాస్, రూ.310 కోట్లకు పైగా షేర్ రాబట్టింది. విదేశాల్లో కూడా రాకీ భాయ్ వసూళ్ల మోత మామూలుగా లేదు. రూ.120 కోట్లకు పైగా గ్రాస్, రూ.60 కోట్ల దాకా షేర్ వచ్చింది.

మొత్తంగా వరల్డ్ తొలి వారంలో ఈ చిత్రం రూ.370 కోట్లకు పైగా షేర్ రాబట్టడం విశేషం. వరల్డ్ వైడ్ ఈ చిత్ర థియేట్రికల్ హక్కుల వాల్యూ రూ.330 కోట్లు. అంటే తొలి వారంలోనే ఓవరాల్‌గా రూ.40 కోట్ల లాభం వచ్చింది. ఈ సినిమా ఇంకో రెండు వారాలు మంచి వసూళ్లనే రాబట్టడం గ్యారెంటీ. ఫుల్ రన్లో రూ.1000 కోట్ల గ్రాస్ కలెక్ట్ చేయడం లాంఛనమే అనిపిస్తోంది. మరి చివరికి రాకీ బాయ్ ఎక్కడ ఆగుతాడో చూడాలి.