Gulte Telugu Telugu Political and Movie News Updates
సత్యదేవ్ అనగానే మెచ్యూర్డ్ యాక్టింగే కాదు.. సీరియస్ సబ్జెక్ట్స్ కూడా గుర్తొస్తాయి. అయితే ఈసారి కాస్త భిన్నంగా ఓ ప్రేమకథలో కనిపించబోతున్నాడు తను. అదే విశేషమంటే అతనికి జంటగా తమన్నా లాంటి స్టార్ హీరోయిన్ నటించడం మరో పెద్ద విశేషం.
వేలెంటైన్స్‌ డే సందర్భంగా ఈ మూవీ ట్రైలర్‌ రిలీజయ్యింది. ఓ ఫ్రెష్ ఫీల్‌ని తీసుకొచ్చింది. తన జీవితంలోని ప్రేమకథలన్నింటినీ గుర్తు చేసుకుంటున్నాడు సత్య. చిన్నప్పటి నుంచి ఎంతమంది అమ్మాయిలు తన లైఫ్‌లోకి వచ్చారో కౌంట్ చేసుకున్నాడు. ప్రతి శీతాకాలంలోనూ తన మనసులో చిగురించిన కొత్త ప్రేమ గురించి నెమరు వేసుకుంటున్నాడు.
ఫైనల్‌గా తనను కలిసిన తమన్నా అందరి లాంటిది కాదని, ఆమె చాలా డిఫరెంట్‌ అని చెప్పిన సత్య.. వీళ్లందరిలో ఎవరిని లైఫ్‌ పార్ట్నర్‌‌ని చేసుకోవాలా అనే డైలమాలో ఉన్నాడు. గంభీరమైన స్వరంతో అతను ఇచ్చిన వాయిస్ ఓవర్.. సత్యతో పాటు అందమైన హీరోయిన్ల విజువల్స్.. బ్యాగ్రౌండ్‌లో కాలభైరవ సూతింగ్‌ బ్యాగ్రౌండ్‌ స్కోర్.. ఇవన్నీ కలిసి ఈ ట్రైలర్‌‌ని స్పెషల్‌గా మార్చేశాయి. ఈ శీతాలపు ప్రేమ సమ్థింగ్ డిఫరెంట్‌ అనే భావనను కలిగించాయి.
తమన్నాతో పాటు మేఘా ఆకాష్, కావ్యాశెట్టి హీరోయిన్లుగా నటిస్తున్న ఈ చిత్రానికి ఆర్.నాగశేఖర్ దర్శకుడు. భావనా రవి, రామారావ్ చింతపల్లితో కలిసి దర్శకుడే నిర్మిస్తున్నాడు. ట్రైలర్‌‌లో ఉన్న ఫీల్‌ సినిమా అంతా క్యారీ అయితే.. సత్యదేవ్, తమన్నాల అకౌంట్‌లో ఓ హిట్టు పడుతుంది. ప్రేక్షకులకు ఓ మంచి ఫీల్‌ గుడ్ లవ్‌స్టోరీ చూసిన అనుభూతి దక్కుతుంది.
