Gulte Telugu Telugu Political and Movie News Updates
నందమూరి బాలకృష్ణ తన తండ్రి తర్వాత ఎంతో అభిమానించే సినీ నటుల్లో అక్కినేని నాగేశ్వరరావు ఒకరు. ఆయన పట్ల బాలయ్య అమితమైన ప్రేమాభిమానాలు, గౌరవభావం చూపించేవాడు ఒకప్పుడు. ఐతే మధ్యలో ఏం జరిగిందో ఏమో అక్కినేని కుటుంబానికి బాలయ్య దూరం అయిపోయాడు. నాగార్జునకు దూరం దూరం ఉంటూ వచ్చాడు. ఏఎన్నార్ చనిపోయినా చివరి చూపుకు బాలయ్య వెళ్లకపోవడం గమనార్హం. అంతలా అక్కినేని కుటుంబంతో ఏం ఇబ్బందులు ఉన్నాయో అని అంతా ఆశ్చర్యపోయారు.
ఆ తర్వాత కూడా బాలయ్య, నాగ్ కలిసి కనిపించిన దాఖలాలు దాదాపు లేవనే చెప్పాలి. మరి తెర వెనుక ఏం జరిగిందో ఏమో మీడియాలో అయితే ఏ సమాచారం లేదు. ఐతే ఇప్పుడు బాలయ్య తాను హోస్ట్ చేసే ‘అన్ స్టాపబుల్’ షోలో ఏఎన్నార్‌ను అనుకరించడం ఇప్పుడు చర్చనీయాంశంగా మారింది.
‘అన్ స్టాపబుల్’ మూడో ఎపిసోడ్లో బ్రహ్మానందం, అనిల్ రావిపూడి అతిథులుగా వచ్చిన సంగతి తెలిసిందే. ఈ ఎపిసోడ్లో ఒక చోట బ్రహ్మానందం.. ఏఎన్నార్‌ను అనుకరించమంటూ బాలయ్యను అడిగాడు. బాలయ్య ఏమాత్రం ఆలస్యం చేయకుండా ఓకే అంటూ పైకి లేచి ఏఎన్నార్‌లా హావభావాలు పలికిస్తూ అచ్చం ఆయన లాగే వాయిస్ మార్చి నిమిషం పాటు ఏకధాటిగా ఒక గ్రాంథిక డైలాగ్ చెప్పాడు.
బాలయ్య తన తండ్రిని చాలాసార్లు అనుకరించాడు కానీ.. ఇలా ఏఎన్నార్ హావభావాలను, సంభాషణలను అనుకరించిన సందర్భాలు ఎప్పుడూ చూసి ఉండరు. అందులోనూ అక్కినేని కుటుంబంతో అనుకోకుండా వచ్చిన విభేదాల నేపథ్యంలో బాలయ్య ఈ టైంలో ఇలా ఏఎన్నార్‌ను అనుకరించడం చర్చనీయాంశంగా మారింది. సోషల్ మీడియాలో ఈ వీడియో ఇప్పుడు వైరల్ అవుతోంది. బాలయ్య బాగా ప్రిపేరయ్యే నాగేశ్వరరావును అనుకరించాడని ఆ వీడియో చూస్తే అర్థమవుతుంది.
