Gulte Telugu Telugu Political and Movie News Updates
వచ్చే ఏడాది సంక్రాంతి కోసం చాలా సినిమాలు సిద్ధమవుతున్నాయి. అయితే అదే సమయానికి ‘ఆర్ఆర్ఆర్’ వస్తుందని చెప్పడంతో ఒకట్రెండు సినిమాలు వాయిదా పడ్డాయి. కానీ ‘రాధేశ్యామ్’, ‘భీమ్లానాయక్’ సినిమాలు మాత్రం వెనుకడుగు వేయడం లేదు. పవన్ సినిమా జనవరి 12న విడుదలవుతుండగా.. ప్రభాస్ సినిమా జనవరి 14న రానుంది. అయితే ఈ సినిమాలతో పాటు నాగార్జున ‘బంగార్రాజు’ కూడా వచ్చే ఛాన్స్ ఉందని టాలీవుడ్ లో మాటలు వినిపిస్తున్నాయి.
నిజానికి సంక్రాంతి కోసమే ఈ సినిమాను రెడీ చేశారు. కానీ బరిలో మూడు పెద్ద సినిమాలు ఉండడంతో ‘బంగార్రాజు’ ఆలోచనలో పడ్డాడు. మొన్నామధ్య నాగార్జున మేనకోడలు, నిర్మాత సుప్రియ కూడా మూడు సినిమాలు బరిలో ఉండగా.. నాల్గో సినిమాకు చోటు దొరకదని.. వీటిలో ఏ సినిమా వెనక్కి తగ్గినా.. తమ సినిమా వచ్చేస్తుందని చెప్పింది. మరెవరైనా.. వెనక్కి తగ్గారో లేదో తెలియదు కానీ.. ‘బంగార్రాజు’ మాత్రం డేట్ లాక్ చేసుకున్నాడని టాక్.
అందుతున్న సమాచారం ప్రకారం.. ఈ సినిమాను జనవరి 15న విడుదల చేయాలనుకుంటున్నారు. అసలైన పండగ ఫీల్ తెచ్చే సినిమా అని.. ఆ డేట్ ను లాక్ చేసుకుంటున్నారు. మరి అనుకున్నట్లుగా రిలీజ్ చేస్తారో లేక వెనకడుగు వేస్తారో చూడాలి. ఇక ఈ సినిమాలో నాగార్జునతో పాటు నాగచైతన్య కూడా నటిస్తున్నారు. నాగ్ సరసన రమ్యకృష్ణ నటిస్తుండగా.. చైతు సరసన కృతిశెట్టి కనిపించనుంది. కళ్యాణ్ కృష్ణ ఈ సినిమాను డైరెక్ట్ చేస్తున్నారు.
