Gulte Telugu Telugu Political and Movie News Updates
ఈ ఏడాదికి ఇక మోస్ట్ అవైటెడ్ మూవీ అంటే ‘పుష్ప: ది రైజ్’ అనే చెప్పాలి. కేవలం తెలుగు ప్రేక్షకులు మాత్రమే కాదు.. వివిధ భాషల వాళ్లు ఈ భారీ చిత్రం కోసం ఉత్కంఠగా ఎదురు చూస్తున్నారు. ‘అల వైకుంఠపురములో’ లాంటి నాన్ బాహుబలి హిట్ తర్వాత అల్లు అర్జున్.. దీని కంటే ముందు నాన్ బాహుబలి హిట్‌గా ఉన్న ‘రంగస్థలం’ తర్వాత సుకుమార్ చేస్తున్న సినిమా ఇది. వీళ్లిద్దరి కలయికలో ఇంతకుముందు వచ్చిన ఆర్య, ఆర్య-2 కూడా ప్రత్యేకమైన చిత్రాలే కావడంతో ‘పుష్ప’ మీద అంచనాలు భారీగా ఉన్నాయి. ఈ సినిమా కోసం నెవర్ బిఫోర్ అవతారంలోకి మారాడు బన్నీ.
తెలుగు హీరోలు ఇంత డీగ్లామరస్‌గా, మొరటుగా కనిపించడం అరుదు. బన్నీ చేస్తున్న పుష్పరాజ్ పాత్రకు సంబంధించి లుక్, కాస్ట్యూమ్స్, బాడీ లాంగ్వేజ్ సహా అన్ని విషయాల్లోనూ ప్రత్యేక శ్రద్ధే తీసుకున్నట్లున్నారు.
‘పుష్ప’ నుంచి కొత్తగా రిలీజైన ‘శ్రీవల్లి’ పాటకు సంబంధించిన విజువల్స్ చూస్తే.. బన్నీ బాడీ లాంగ్వేజ్ కొంచెం చిత్రంగా అనిపిస్తోంది అందరికీ. అతను కొంచెం వైకల్యం కూడా ఉన్న వాడిగా కనిపించబోతున్నాడేమో ఈ సినిమాలో అనిపిస్తోంది. శ్రీ వల్లి పాటలో బన్నీ స్టెప్ ఒకటి లిరికల్ వీడియోలో చూపించారు. అందులో చూస్తే అతడి ఎడమ భుజాన్ని కొంచెం పైకెత్తి పెట్టుకున్నట్లుగా కనిపించింది. కొంచెం అంగ వైకల్యం ఉన్నవాడిలా కనిపించాడు బన్నీ అందులో.
ఇంతకుముందు రిలీజ్ చేసిన ‘దాక్కో దాక్కో మేక’లో కూడా బన్నీ భుజం కొంచెం పైకే కనిపించింది. అదేదో యాదృచ్ఛికం అనుకున్నారు కానీ.. ఉద్దేశపూర్వకంగానే ఈ పాత్రను ఇలా చూపించబోతున్నట్లు అర్థమవుతోంది. దాన్నొక మేనరిజంలా చూపించడానికి అలా చేశారా.. లేక హీరోకు ఏదైనా వైకల్యం ఉన్నట్లు చెప్పబోతున్నారా అన్నది ఆసక్తికరం. సినిమా అంతటా కూడా బన్నీ ఇలాగే కనిపిస్తాడన్నది మాత్రం స్పష్టంగా అర్థమవుతోంది.
