రంగ్ దే.. ఆ లీగ్‌లోకి క‌ష్ట‌మే

సంక్రాంతి స‌మ‌యంలో క్రాక్.. ఫిబ్ర‌వ‌రిలో ఉప్పెన.. మార్చిలో జాతిర‌త్నాలు.. బాక్సాఫీస్‌ను ఎలా రూల్ చేశాయో తెలిసిందే. ఈ సినిమాలకు పోటీగా వేరే చిత్రాలు కూడా విడుద‌ల‌య్యాయి. ఐతే ఎక్కువ‌ పాజిటివ్ టాక్ వీటికే వ‌చ్చింది. పోటీలో ఉన్న మిగ‌తా చిత్రాల‌ను ఇవి తొక్కి ప‌డేశాయి. రెండు మూడు వారాల పాటు బాక్సాఫీస్‌ను రూల్ చేశాయి. త‌ర్వాతి వారాల్లో వ‌చ్చిన సినిమాల‌ను కూడా వెన‌క్కి నెట్టాయి.

ఈ మూడు చిత్రాల స‌ర‌స‌న చేరుతుంద‌ని అంచ‌నా వేసిన సినిమా ‘రంగ్ దే’. గ‌త వారాంతంలో మూడు చిత్రాలు విడుద‌ల కాగా.. అన్నింట్లోకి మంచి టాక్ తెచ్చుకున్న‌ది ‘రంగ్ దే’నే. పైన చెప్పుకున్న సినిమాల్లాగే ఇది వీకెండ్లో వచ్చిన మిగతా సినిమాలను తొక్కేసింది. బాక్సాఫీస్‌ను రూల్ చేసింది. సోమవారం హోలి సెలవు కూడా కలిసి రావడంతో ‘రంగ్ దే’ రూ.12.5 కోట్ల మేర వరల్డ్ వైడ్ షేర్ రాబట్టగలిగింది.

ఐతే వీకెండ్ వరకు మంచి వసూళ్లు రాబట్టింది కానీ.. ‘రంగ్ దే’ ఆ తర్వాత ఆశించిన స్థాయిలో జోరు చూపించట్లేదు. మంగళవారం వసూళ్లు తగ్గుముఖం పట్టాయి. క్రాక్, ఉప్పెన, జాతిరత్నాలు తరహాలో ఇది రిలీజైన తర్వాతి వారాల్లోనూ ఆధిపత్యం చలాయించే అవకాశాలు తక్కువగానే కనిపిస్తున్నాయి. పై సినిమాల స్థాయిలో ఈ చిత్రంలో ప్రేక్షకులను గట్టిగా ఆకర్షించే అంశాలు తక్కువే. ‘

క్రాక్’ మాస్ ప్రేక్షకులకు విందు కాగా.. ‘ఉప్పెన’ మంచి ఫీల్ ఉన్న, హార్డ్ హిట్టింగ్ లవ్ స్టోరీ కావడంతో యువత బాగా ఆకర్షితులయ్యారు. ‘జాతిరత్నాలు’ హిలేరియస్ మూవీ కావడంతో అన్ని వర్గాల ప్రేక్షకులూ థియేటర్లకు పరుగులు పెట్టారు. ‘రంగ్ దే’ యావరేజ్‌గా అనిపించే టైంపాస్ మూవీ కావడంతో వీకెండ్ తర్వాత హోల్డ్ చేయడం కష్టమయ్యేలా ఉంది. పైగా ఈ వారం ‘వైల్డ్ డాగ్’, ‘సుల్తాన్’ మంచి అంచనాలతో రిలీజవుతున్నాయి. తర్వాతి వారం ‘వకీల్ సాబ్’ ఉంది. కాబట్టి ‘రంగ్ దే’కు లాంగ్ రన్ డౌటే. బ్రేక్ ఈవెన్ కావాలంటే రూ.20 కోట్లకు పైగానే షేర్ రాబట్టాల్సిన ఈ చిత్రం ‘హిట్’ స్టేటస్ అందుకుంటుందా అన్నదీ సందేహమే.