టాక్సిక్‌తో దిల్ రాజుకి లాభాలొచ్చాయా?

కేజీఎఫ్‌, కేజీఎఫ్-2 చిత్రాల‌తో పాన్ ఇండియా స్థాయిలో పెద్ద సూప‌ర్ స్టార్ల‌లో ఒక‌డిగా అవ‌త‌రించిన య‌శ్ నుంచి.. ఆ త‌ర్వాత భారీ అంచ‌నాల మ‌ధ్య వ‌చ్చిన చిత్రం.. టాక్సిక్. ఆగ‌స్టు చివ‌రి వారంలో ప్ర‌పంచ వ్యాప్తంగా భారీ అంచ‌నాల మ‌ధ్య ఈ సినిమా ప్రేక్ష‌కుల ముందుకు వ‌చ్చింది. కానీ ఆ అంచ‌నాల‌ను క‌నీస స్థాయిలో కూడా టాక్సిక్ అందుకోలేక‌పోయింది. తొలి రోజు భారీ ఓపెనింగ్స్ వ‌చ్చిన‌ప్ప‌టికీ.. ఆ త‌ర్వాత సినిమా చ‌తికిల‌ప‌డింది. 

తెలుగులో ఈ మూవీని రిలీజ్ చేసిన దిల్ రాజు భారీ న‌ష్టాల పాలైన‌ట్లుగా వార్త‌లు వ‌చ్చాయి. కానీ ఆయ‌న మాత్రం ఈ సినిమాతో కూడా తాను కొంత మేర లాభాలే అందుకున్న‌ట్లు చెప్ప‌డం విశేషం. త‌న డిస్ట్రిబ్యూష‌న్లో వ‌చ్చిన దీపావ‌ళి చిత్రాలు రామాయణం, సీన్ విజ‌యంత‌మైన నేప‌థ్యంలో మీడియాను క‌లిసిన దిల్ రాజు.. టాక్సిక్, రామాయ‌ణం సినిమాల ఫ‌లితాల గురించి మాట్లాడారు.

తాను టాక్సిక్ సినిమాతో భారీగా న‌ష్ట‌పోయిన‌ట్లు సోష‌ల్ మీడియాలో కొంద‌రు పెయిడ్ పోస్టులు పెట్టించిన‌ట్లు దిల్ రాజు వ్యాఖ్యానించారు. ఐతే తాను టాక్సిక్‌తో పాటు రామాయ‌ణం సినిమాను క‌మిష‌న్ బేసిస్ మీద డిస్ట్రిబ్యూట్ చేశాన‌ని.. వీటి ద్వారా త‌న‌కు లాభాలు వ‌చ్చాయే త‌ప్ప న‌ష్టం రాలేద‌ని ఆయ‌న స్ప‌ష్టం చేశారు. త‌న అనుభ‌వంతో టాక్సిక్ సినిమాను స‌రిగ్గా డిస్ట్రిబ్యూట్ చేసినందుకు కొంత వ‌ర‌కు లాభం వ‌చ్చింద‌ని ఆయ‌న చెప్పారు. ఇక రామాయ‌ణం ద్వారా మంచి లాభమే ఆర్జించిన‌ట్లు రాజు తెలిపారు.

త‌న‌కు డిస్ట్రిబ్యూట‌ర్‌గా అపార అనుభ‌వం ఉంద‌ని.. ఏదీ గుడ్డిగా చేయ‌న‌ని.. ఇండ‌స్ట్రీలో ఏం జ‌రుగుతోందో త‌న‌కు తెలియ‌ద‌ని అనుకుంటే పొర‌పాట‌ని.. అన్నీ గ‌మ‌నిస్తూ ఉంటాన‌ని రాజు తెలిపారు. త‌న చుట్టూ ఉన్న వాళ్లు కూడా ఎప్పుడు ఏం జ‌రుగుతోందో.. ఎవ‌రేం చేస్తున్నారో చూపిస్తూనే ఉంటార‌ని రాజు అన్నారు.

తాను ప్ర‌స్తుతం బాలీవుడ్లో స‌ల్మాన్ ఖాన్‌తో ఒక సినిమా, అక్ష‌య్ కుమార్‌తో ఓ సినిమా ప్రొడ్యూస్ చేస్తున్నాన‌ని.. అవి చివ‌రి ద‌శ‌లో ఉన్నాయ‌ని.. అంత పెద్ద స్టార్ల‌తో ఒక తెలుగు నిర్మాత సినిమాలు తీయ‌డం మామూలు విష‌యం కాద‌ని.. వ‌చ్చే ఏడాది మార్చి, ఫిబ్ర‌వ‌రి నెల‌ల్లో ఈ చిత్రాలు విడుద‌ల‌వుతాయ‌ని.. అవి రిలీజ‌య్యాక దిల్ రాజు ఏంటో అంద‌రికీ తెలుస్తుంద‌ని రాజు ధీమా వ్యక్తం చేశారు.