జూనియర్ విజయ్ నేర్చుకోవాల్సింది ఎంతో ఉంది

తమిళనాడు సిఎం విజయ్ వారసుడిగా జేసన్ సంజయ్ హీరోగా తెరంగేట్రం చేసి ఉంటే ఈపాటికి అభిమానులు, నిర్మాతలు రెడ్ కార్పెట్ వేసి పరిశ్రమలోకి స్వాగతం చెప్పేవాళ్ళు. కానీ తను నటన కంటే దర్శకత్వం వైపు మొగ్గు చూపడం అందరినీ ఆశ్చర్యానికి గురి చేసింది. సరే కుర్రాడు ఇంత ధీమాగా ఉన్నాడు అంటే ఏదో అద్భుతం చేస్తాడేమో అని ఫ్యాన్స్ భావించారు. అయితే సిగ్మాకు మొదటి షో నుంచే ఆశించిన స్పందన కనిపించలేదు. ఓపెనింగ్స్ వచ్చాయి కానీ నిలబడేంత టాక్ వినిపించలేదు.

కారణం జేసన్ సంజయ్ ఎంచుకున్న కథా కథనాలు. యుఎస్ లో శిక్షణ తీసుకుని ఇతను ఆలోచించింది, రాసుకుంది ఇలాంటి స్టోరీనా అని అనుమానం వచ్చేంత తక్కువ స్థాయిలో కంటెంట్ ఉండటం నెగటివ్ ఫీడ్ బ్యాక్ తీసుకొచ్చింది. పుస్తకాలు ఉండే లైబ్రరీలు అంతరించిపోయిన టైంలో దాన్ని నడుపుతున్న హీరో చుట్టూ వెయ్యి కోట్ల ట్విస్టుని లింక్ చేసే ఆలోచన బాగానే ఉన్నా దాన్ని తెరమీద ప్రెజెంట్ చేసే తీరుబాలేదు. జేసన్ సంజయ్ బేసిక్స్ కంటే తక్కువ స్థాయిలో ఉండటంన వల్ల అవుట్ ఫుట్ తేడా కొట్టేసింది.

జూనియర్ విజయ్ గుర్తించాల్సింది ఒకటుంది. ఆడియన్స్ చాలా తెలివి మీరిపోయారు. కేవలం తమ భాషనే కాకుండా ఫారిన్ లాంగ్వేజెస్ లో కూడా కంటెంట్ చూస్తున్నారు. నెట్ ఫ్లిక్స్, అమెజాన్ ప్రైమ్ లాంటి ఇంటర్నేషనల్ ప్లాట్ ఫార్మ్స్ వచ్చాక ఇది మరింత తేలికయ్యింది. సో వాళ్ళను మెప్పించాలంటే ఆషామాషీ కథలతో పనవ్వదు. అంత ఇమేజ్ ఉన్న తండ్రి జన నాయకుడు ఏం చేసింది. దారుణంగా బోల్తా కొట్టింది. కారణమేంటో తెలిసిందే. ఒక హిట్ రీమేక్ సైతం కాపాడలేకపోయింది.

సిగ్మా టేకింగ్ చూశాక జేసన్ సంజయ్ సీరియస్ గా సీనియర్ల దగ్గర శిక్షణ లేదా సలహాలు తీసుకోవాలి. ఇలా నాకు తోచింది తీస్తాను అంటే కుదరదు. త్రివిక్రమ్ శ్రీనివాస్, రవితేజ లాంటి వాళ్ళు తమ పిల్లలను స్టార్ డైరెక్టర్ల దగ్గర ట్రైనింగ్ కు పంపడానికి కారణం ఇదే. కానీ జేసన్ నేరుగా మెగా ఫోన్ పట్టుకున్నాడు. మాటల్లో ఉన్నంత కాన్ఫిడెన్స్ తెరమీద చేతల్లో లేదు. ఇది అర్జెంట్ గా మార్చుకోవాలి. లేదూ ఈ రిస్క్ ఎందుకనుకుంటే హీరో అయిపోవాలి. ఎస్ అంటే చాలు ప్రొడ్యూసర్లు ఇంటి ముందు క్యూ కడతారు.