కియారాకు ఎలాంటి బ్రేక్ ఇస్తుందో

అందం అభినయం రెండూ ఉన్న కియారా అద్వానీతో అదృష్టం దోబూచులాడుతోంది. ఒకదశలో కరీనా కపూర్ ఎంజాయ్ చేసిన స్టార్ డం చూసే హీరోయిన్ గా తన గురించి ముంబై మీడియా ఓ రేంజ్ లో ఎలివేషన్లు ఇచ్చింది. కానీ గత కొంత కాలంగా ఈ అమ్మడికి సరైన సక్సెస్ దక్కలేదు. వార్ 2 లాంటి ప్యాన్ ఇండియా మూవీలో హృతిక్ రోషన్ సరసన నటిస్తే అదేమో యష్ రాజ్ ఫిలింస్ బ్యానర్ లోనే అతి పెద్ద డిజాస్టర్ అయ్యింది. అందులో జూనియర్ ఎన్టీఆర్ ఉన్నా లాభం లేకపోయింది.

దానికన్నా ముందు ‘గేమ్ ఛేంజర్’ మరో పీడకల. శంకర్ లాంటి లెజెండరీ దర్శకుడు కదా పెద్ద బ్రేక్ ఇస్తాడనుకుంటే ఆయనేమో అల్ట్రా డిజాస్టర్ చేతిలో పెట్టాడు. రామ్ చరణ్ తో ‘వినయ విధేయ రామ’ తర్వాత రెండోసారి జట్టు కట్టిన కియారాకు తీవ్ర నిరాశ తప్పలేదు. బాలీవుడ్ మూవీ సత్య ప్రేమ్ కి కథ, గోవిందా నామ్ మేరే అడ్రెస్ లేకుండా పోగా ‘జగ్ జగ్ జియో’ ఓ మోస్తరుగా ఓకే అనిపించుకుంది. తన చివరి హిట్టు నాలుగేళ్ళ క్రితం వచ్చిన భూల్ భులయ్యా 2.

పెళ్లయ్యాక కొంచెం బ్రేక్ తీసుకోవడం, తల్లి కావడం లాంటి పరిణామాల వల్ల కియారాకు గ్యాప్ వచ్చింది. ఇప్పుడు టాక్సిక్ రూపంలో కన్నడలో అడుగు పెట్టింది. అయితే ఇందులో తనే మెయిన్ హీరోయిన్ అయినప్పటికీ కథ మొత్తం తన చుట్టే తిరిగదు. నయనతార, రుక్మిణి వసంత్, తారా సుతారియా, హ్యూమా ఖురేషిలు కూడా ఉన్నారు. దర్శకురాలు గీతూ మోహన్ దాస్ అందరికీ తగిన ప్రాధాన్యం ఇచ్చి ఉంటే కనక కియారా ఎంత హైలైట్ అవుతుందనేది చెప్పలేం.

బ్లాక్ బస్టర్ అయితే మటుకు సౌత్ నుంచి క్రేజీ ఆఫర్స్ రావడం ఖాయం. ముఖ్యంగా తమిళం వైపు ఆమె చూపు గట్టిగానే ఉంది. ఓకే అంటే ఆఫర్లు ఇచ్చేందుకు దర్శకులు సిద్ధంగా ఉన్నారు. ఇన్ సైడ్ టాక్ ప్రకారం టాక్సిక్ లో కియారాకు చెప్పుకోదగ్గ స్పేస్ దక్కిందట. ఒక షాకింగ్ ట్విస్టు కూడా ఉంటుందని, సాధారణంగా హీరోయిన్లు చేయడానికి ఒప్పుకోని ఒక ముఖ్యమైన మలుపుకు ఎస్ చెప్పిందని అంటున్నారు. అదేంటో తెలియాలంటే మరికొద్ది గంటల్లో ప్రారంభం కాబోయే ప్రీమియర్లలో చూడాలి.