చివరి సినిమా టోటల్ కలెక్షన్లు… ఒక్క రోజులోనే ఔట్

మాస్ రాజా రవితేజ నుంచి సరైన సినిమా వస్తే.. పరిస్థితులు కూడా అనుకూలిస్తే బాక్సాఫీస్ దగ్గర ఎలాంటి అద్భుతాలు జరుగుతాయో ‘ఇరుముడి’ సినిమా రుజువు చేస్తోంది. టైర్-1 హీరోల సినిమాలకు దగ్గరగా ఈ సినిమా వసూళ్ల మోత మోగిస్తోంది. నిన్న ఈవెనింగ్, నైట్ షోలకు ఎక్కడా టికెట్ ముక్క మిగలని పరిస్థితి. తెలుగు రాష్ట్రాల్లో పెద్ద సిటీల నుంచి చిన్న టౌన్ల వరకు ప్రతి చోటా ‘ఇరుముడి’కి హౌస్ ఫుల్స్ పడ్డాయి.

ఈ రోజు కూడా ఈ సినిమా బాక్సాఫీస్ రాంపేజ్ కొనసాగుతోంది. ఆదివారం కూడా ‘ఇరుముడి’కి తిరుగుండదని స్పష్టమవుతోంది. నిర్మాతలు, బయ్యర్ల పెట్టుబడి మొత్తాన్ని వీకెండ్లోనే సినిమా వెనక్కి తెచ్చేస్తే ఆశ్చర్యం లేదు. తొలి రోజు అంత మంచి ఆరంభం దక్కింది ‘ఇరుముడి’కి. ట్రేడ్ అంచనాలన్నీ దాటేస్తూ ‘ఇరుముడి’ శుక్రవారం వరల్డ్ వైడ్ రూ.24 కోట్ల గ్రాస్ కలెక్షన్లు రాబట్టింది. ఇది రవితేజ చివరి చిత్రం ‘భర్త మహాశయులకు విజ్ఞప్తి’ ఫుల్ రన్ వసూళ్లకు సమానం కావడం విశేషం.

సంక్రాంతి లాంటి క్రేజీ సీజన్లో రిలీజైనప్పటికీ.. ఆ సీజన్‌కు తగ్గ ఫ్యామిలీ మూవీ అయినప్పటికీ ‘భర్త మహాశయులకు విజ్ఞప్తి’ పెద్దగా ప్రభావం చూపలేకపోయింది. ఫుల్ రన్లో పాతిక కోట్ల లోపు గ్రాస్, రూ.12 కోట్ల షేర్‌తో సరిపెట్టుకుంది. కానీ ‘ఇరుముడి’ మాత్రం తొలి రోజు దాదాపు దానికి సమానమైన కలెక్షన్ రాబట్టి ఔరా అనిపించింది. ఇది రవితేజ మార్కు మాస్ మూవీ కాకపోయినా.. ఈ రేంజ్ కలెక్షన్ రావడం విశేషమే.

ఇప్పుడు ఫ్యామిలీ సినిమాలు బాగా ఆడుతుండడం.. పైగా కథాకథనాలు చాలా బాగుండడం.. ఎమోషన్ బాగా వర్కవుట్ కావడం.. అన్నింటికీ మించి ఈ చిత్రంతో అయ్యప్ప స్వామి కనెక్షన్ ఉండడం.. సినిమాకు బాగా ప్లస్ అయి.. బాక్సాఫీస్ దగ్గర ‘ఇరుముడి’ అద్భుతాలు చేస్తోంది. రవితేజకు ఇది వంద కోట్ల సినిమా కావడం లాంఛనమే. కానీ సినిమా అంతటితో ఆగేలా లేదు. ఇంకా పెద్ద రేంజికి వెళ్లి మాస్ రాజా కెరీర్లో హైయెస్ట్ గ్రాసర్‌గా నిలవబోతోంది. శివ నిర్వాణ దర్శకత్వంలో తెరకెక్కిన ఈ చిత్రాన్ని మైత్రీ మూవీ మేకర్స్ నిర్మించింది.