ఇండియన్ స్టార్ హీరోల సరసన టామ్ హాలండ్

అదేంటో స్పైడర్ మ్యాన్ జ్వరం మనోళ్లకు ఓ రేంజ్ లో పట్టేసింది. భాషతో సంబంధం లేకుండా ముంబై నుంచి మచిలీపట్నం దాకా ఒకటే మోత. ఎన్నడూ లేనిది ఒక హాలీవుడ్ మూవీకి ఈ స్థాయిలో ఎగబడటం చూసి థియేటర్ ఓనర్లు ఆశ్చర్యపోతున్నారు. ఏదో ప్రభాస్ మూవీ రిలీజయ్యిందానే రేంజ్ లో టికెట్ల కోసం వాళ్లకు ఫోన్లు రావడం విచిత్రాల్లో విచిత్రం. నిన్న మల్టీప్లెక్సులు, సింగల్ స్క్రీన్లు తేడా లేకుండా దాదాపు అన్ని చోట్ల హౌస్ ఫుల్స్ పడ్డాయి. ఓవర్ ఫ్లోస్ పక్క సినిమాలకు ఉపయోగపడ్డాయి.

కేవలం నాలుగు రోజుల్లో మూడు వందల కోట్ల గ్రాస్ దాటడం దిమ్మదిరిగిపోయేలా చేస్తోంది. బ్రాండ్ న్యూ డేని ఒక్కసారైనా బిగ్ స్క్రీన్ మీద ఎక్స్ పీరియన్స్ అవ్వాల్సిందేనని జనాలు ఫిక్స్ కావడం వల్ల ఈ స్థాయి రెస్పాన్స్ కనిపిస్తోంది. ఏపీ తెలంగాణలో తెలుగు వెర్షన్ కే ఎక్కువ డిమాండ్ ఉన్న వైనం స్పష్టం. హైదరాబాద్ లాంటి ఏ సెంటర్స్ లో ఇంగ్లీష్ కి ప్రాధాన్యం ఇస్తున్నా కింది కేంద్రాల్లో మాత్రం డబ్బింగ్ బొమ్మ ఎక్కడ ఆడుతుందో చూసి మరీ టికెట్లు కొనుక్కుంటున్నారు.

ఈ వసూళ్ల దెబ్బకు టామ్ హాలండ్ మన హీరోల సరసన చేరిపోయాడు. అదెలాగంటే సింగల్ డేలో వంద కోట్ల గ్రాస్, నాలుగు రోజుల్లో మూడు వందల కోట్ల గ్రాస్ దాటేన అతి కొద్దిమంది హీరోల్లో ఇతగాడి పేరు తోడయ్యింది. ఇప్పటికేదాకా ఈ లిస్టులో ఉన్న రజనీకాంత్, విజయ్, ప్రభాస్, అల్లు అర్జున్, జూనియర్ ఎన్టీఆర్, రామ్ చరణ్, రణ్వీర్ సింగ్ పక్కన టామ్ హాలండ్ చోటు దక్కించుకున్నాడు. ఇది తెలుసుకున్న సోషల్ మీడియా ఫ్యాన్స్ సంబరం మాములుగా లేదు.

అయితే ఇదేదో నాలుగు రోజులకు పరిమితమైన నీటి బుడగ హడావిడి కాదు సోమవారం బుకింగ్స్ కూడా స్ట్రాంగ్ గా ఉన్నాయి. ముఖ్యంగా సాయంత్రం షోలు ఫుల్స్ పడటం పక్కా. ఇదే జోరు ఇంకో వీకెండ్ కూడా ఉంటుందని బయ్యర్లు అంచనా వేస్తున్నారు. మన దగ్గర కొరియన్ కనకరాజు, కెజెక్యూ, డిసి లాంటి చెప్పుకోదగ్గ రిలీజులు ఉన్నాయి కానీ వాటి ప్రభావం సాలీడు మనిషి మీద ఏ మేరకు ఉంటుందో చెప్పలేం. ఏదైతేనేం స్పైడర్ మ్యాన్ యూఫోరియా ఇప్పట్లో మర్చిపోయేది కాదు.