సర్దార్ 2 ఈసారి మరింత సీరియస్

కార్తీ కెరీర్ బెస్ట్ హిట్స్ గా చెప్పుకునే సినిమాల్లో ఖైదీ, నా పేరు శివ తర్వాత సర్దార్ ఉంటుంది. తెలుగులోనూ మంచి హిట్ సాధించిన ఈ స్పై డ్రామా కొనసాగింపు కోసం అభిమానులు ఎప్పటి నుంచో ఎదురు చూస్తున్నారు. మధ్యలో దర్శకుడు మిత్రన్ టాలీవుడ్ స్టార్లతో ప్యాన్ ఇండియా మూవీ తీయాలని ట్రై చేసి తిరిగి సర్దార్ కొనసాగింపుకే వెళ్లిపోయారు. మాళవిక మోహనన్ హీరోయిన్ గా నటించిన ఈ చిత్రంలో మొదటి భాగంలో నటించిన వాళ్ళతో పాటు కొత్త క్యాస్టింగ్ తోడయ్యారు.

తాజాగా విడుదల చేసిన టీజర్ లో క్లుప్తంగా కథేంటో చెప్పారు. రహస్య జీవితాన్ని పూర్తి చేసుకుని బయటికి వచ్చిన సర్దార్ (కార్తీ) వయసైపోయినా కూడా శత్రువుల భరతం పట్టేందుకు ఏమాత్రం వెనుకాడడు. కొడుకు (కార్తీ) పైకి జులాయిగా సరదాగా కనిపించినా అవసరం వచ్చినప్పుడు తుక్కు రేపే టైపు. వీళ్లిద్దరి కామన్ ఎనిమి (ఎస్జె సూర్య) దేశాన్ని నాశనం చేయడానికి పూనుకుంటాడు. మరి తండ్రి కొడుకులు కలిసి ఎలా వాడి మిషన్ ని భగ్నం చేశారనేది స్టోరీ పాయింట్ గా కనిపిస్తోంది.

స్కేల్ పరంగా చూసుకుంటే సర్దార్ 2కి ఈసారి భారీగా ఖర్చు పెట్టారు. విజువల్స్, యాక్షన్ బ్లాక్స్ చూస్తేనే అర్థమైపోతుంది. కార్తీ డ్యూయల్ రోల్ లో మరోసారి అదరగొట్టేలా ఉన్నాడు. రాజా సాబ్ లో మిస్ ఫైర్ అయిన మాళవిక మోహనన్  కు ఎక్కువ స్కోప్ దొరికింది. అయితే ఎస్జె సూర్య ఎప్పటిలాగే తన డామినేషన్ చూపించే ప్రయత్నం చేశారు. ఒక డైలాగ్ లో ఆ మాట చెప్పించారు కూడా. సామ్ సిఎస్ సంగీతం సమకూరుస్తున్న ఈ మూవీలో ఆశికా రంగనాథ్ మరో హీరోయిన్.

సెప్టెంబర్ 10 రెండో సర్దార్ విడుదల కాబోతున్నాడు. అన్నపూర్ణ స్టూడియోస్ టై అప్ కాబట్టి రిలీజ్ చాలా గ్రాండ్ గా ఉండబోతోంది. పోటీలో ఉంటాయనుకున్న ధనుష్ ఓం, విజయ్ దేవరకొండ రణబాలి వాయిదా పడటంతో ఆ అవకాశం సర్దార్ 2కి కలిసి రానుంది. సక్సెస్ కోసం కార్తీ మొహం వాచిపోయి ఉన్నాడు. జపాన్, అన్నగారు వచ్చారు చాలా దారుణంగా పోయాయి. అన్నయ్య సూర్యకు వీరభద్రుడు బ్లాక్ బస్టర్ ఇచ్చినట్టు తమ్ముడికి సర్దార్ బ్రేక్ ఇస్తాడేమో చూడాలి.