లెనిన్ జేబులో వంద కోట్లు పడతాయా

అక్కినేని అఖిల్ కు బలమైన కంబ్యాక్ గా నిలిచిన లెనిన్ థియేటర్ రన్ ఇంకా కొనసాగుతోంది. అయితే చెన్నై లవ్ స్టోరీకి వచ్చిన పాజిటివ్ టాక్ తో పాటు అంతకు ముందు ఒడిస్సి క్రేజ్ అయ్యగారి వసూళ్ల మీద తీవ్ర ప్రభావం చూపించింది. తక్కువ స్క్రీన్లు ఉన్న చాలా సెంటర్లలో అఖిల్ షోలను వేరే వాటికి సర్దుబాటు చేయాల్సి వచ్చింది. అలాని ఆక్యుపెన్సీలు తీవ్రంగా పడిపోయాయా అంటే అదీ లేదు. మొన్న ఆదివారం కూడా డీసెంట్ నెంబర్లు పడ్డాయి. అయినా సరే పరిస్థితి అలా మారిపోయింది.

నిర్మాత నాగవంశీ సక్సెస్ మీట్ లో మాట్లాడుతూ ఎలాగైనా లెనిన్ ని వంద కోట్ల క్లబ్బులో చేర్చమని ప్రేక్షకులకు పిలుపు ఇచ్చారు. అదేదో బాధ్యతగా నొక్కి చెప్పారు. కానీ ప్రతి వారం కొత్త ఆప్షన్లు వచ్చేయడంతో ఆడియన్స్ నిర్ణయాలు మారిపోయాయి. సితార ఎంటర్ టైన్మెంట్స్ అధికారికంగా జూలై 20న వేసిన లెనిన్ ట్వీట్ లో వరల్డ్ వైడ్ గ్రాస్ 88 కోట్లుగా పేర్కొంది. అంటే ఇప్పుడీ ఎనిమిది రోజుల్లో పన్నెండు కోట్లు రావడం జరగని పని. ఇంకో వీకెండ్ మీద ఆశలు పెట్టుకుని వేచి చూడాలి.

అసలైన ముప్పు మరొకటి ఉంది. జూలై 30 స్పైడర్ మ్యాన్ బ్రాండ్ న్యూ డే దిగుతున్నాడు. క్రేజ్ మాములుగా లేదు. జిల్లా కేంద్రాల్లో సైతం ఫస్ట్ డే టికెట్లు అడ్వాన్స్ గా అమ్ముడుపోతున్నాయి. ఇక హైదరాబాద్ లాంటి నగరాల్లో చెప్పనవసరం లేదు. ఒకవేళ పాజిటివ్ టాక్ వస్తే పిల్లా పెద్దా అందరూ దీన్ని చూసేందుకు ఎగబడతారు. అప్పుడు లెనిన్ కే కాదు చెన్నై లవ్ స్టోరీకి కూడా ఇబ్బంది తప్పదు. పైగా స్పైడర్ మ్యాన్ తో ఈసారి హల్క్ తోడవ్వడం అంచనాలు పెంచుతోంది.

లెనిన్ ఫైనల్ థియేటర్ రన్ అయ్యేలోపు వంద కోట్ల పోస్టర్ పడుతుందని ఫ్యాన్స్ ధీమాగా ఉన్నారు. నిజంగా అవుతుందా లేక టాలీవుడ్ లో రెగ్యులర్ గా నడిచే ట్రెండ్ ప్రకారం కలిపి వేసేస్తారా అనేది ఇప్పుడే చెప్పలేం. నిజంగా వస్తే సంతోషమే. లెక్కల సంగతి పక్కనపెడితే లెనిన్ జెన్యూన్ గా హిట్టయిన మాట నిజం. ఇకపై అఖిల్ మరింత జాగ్రత్తగా కథలను ఎంచుకునే ఆలోచనని కూడా ప్రేరేపించింది. నెక్స్ట్ ఎవరితో ఏ బ్యానర్ లో చేస్తాడనేది ఐనా సస్పెన్స్ గానే ఉంది.