లెనిన్ వేడి తగ్గిందా?

గత శుక్రవారం ఒక మోస్తరు అంచనాల మధ్య విడుదలైన అక్కినేని అఖిల్ సినిమా ‘లెనిన్’ తొలి వీకెండ్లో ఆ అంచనాలను మించి వసూళ్లు రాబట్టింది. వారాంతంలోనే సినిమా బ్రేక్ ఈవెన్‌కు చేరువ అయింది. మరీ మేకర్స్ ప్రకటించిన స్థాయిలో వసూళ్లు రాబట్టలేదు కానీ.. అఖిల్ మార్కెట్, సినిమా స్థాయికి చాలా ఎక్కువ వసూళ్లే వచ్చాయి. ఐతే టాక్ కొంచెం డివైడ్‌గా ఉన్న నేపథ్యంలో ఈ చిత్రం వీకెండ్ తర్వాత నిలబడగలదా అన్న సందేహాలు కలిగాయి.

కానీ సోమవారం ఈ చిత్రానికి రూ.5 కోట్ల మేర గ్రాస్ రావడంతో సినిమా నిలబడినట్లే కనిపించింది. కానీ రోజులు గడుస్తున్న కొద్దీ ‘లెనిన్’ వీక్ అవుతున్న సంకేతాలు కనిపిస్తున్నాయి. సోమవారంతో పోలిస్తే మంగళవారం.. ఆ రోజుతో పోలిస్తే బుధవారం కలెక్షన్లు తగ్గాయి. ఆరో రోజు ఈ చిత్రం వరల్డ్ వైడ్ 3 కోట్లకు అటు ఇటుగా గ్రాస్ కలెక్ట్ చేసిందంతే.

వీకెండ్లో ఈ సినిమా జోరు చూస్తే.. బాక్సాఫీస్ దగ్గర పోటీ లేని నేపథ్యంలో వీక్ డేస్‌లోనూ ఇంకా మెరుగైన వసూళ్లు రాబడుతుందనే అంచనాలు కలిగాయి. సోమవారం పరిస్థితి ఆశాజనకంగా కనిపించింది కూడా. కానీ తర్వాత రోజు రోజుకూ వసూళ్లు తగ్గుతున్నాయి. రెండో వీకెండ్లో ఈ చిత్రం ఏమేర వసూళ్లు రాబడుతుందన్నది సందేహం.

ఈ వారం వచ్చే తెలుగు చిత్రాల నుంచి ‘లెనిన్’ పెద్ద పోటీ లేదు కానీ.. హాలీవుడ్ మూవీ ‘ది ఒడిస్సీ’ ధాటిని తట్టుకోవడం మాత్రం కష్టమే అనిపిస్తోంది. ఆ చిత్రం ఇంగ్లిష్, హిందీ భాషల్లో భారీ స్థాయిలో రిలీజవుతుండగా.. అడ్వాన్స్ బుకింగ్స్ జోరుమీదున్నాయి. కాబట్టి ‘లెనిన్’ బాక్సాఫీస్ రన్ ఈ వీకెండ్లో ఆశించిన స్థాయిలో ఉంటుందా అన్నది ప్రశ్నార్థకమే.