Gulte Telugu Telugu Political and Movie News Updates
మాస్ మహారాజా రవితేజ లైనప్ అభిమానుల అంచనాలకు తగ్గట్టు చక్కగా కనిపిస్తోంది. వరస డిజాస్టర్ల సంగతి పక్కనపెడితే ఇరుముడి మీద పాజిటివ్ బజ్ ఏర్పడుతోంది. దర్శకుడు శివ నిర్వాణకు కమర్షియల్ సినిమాలు హ్యాండిల్ చేసిన అనుభవం లేకపోయినా ఇన్ సైడ్ టాక్స్, ప్రీ రిలీజ్ రిపోర్ట్స్ సానుకూలంగా ఉండటంతో బిజినెస్ ఆఫర్లు బాగున్నాయి. మైత్రి మూవీ మేకర్స్ కి ప్రాఫిటబుల్ వెంచర్ అవుతుందనే నమ్మకం ఇండస్ట్రీ వర్గాల్లో బలంగా ఉంది.
దీని తర్వాత రవితేజ దర్శకుడు హసిత్ గోలికి ఒక కమిట్ మెంట్ ఇచ్చిన సంగతి తెలిసిందే. ఇంకా అధికారికంగా ప్రకటించలేదు కానీ లైన్ ఓకే అయ్యిందని సమాచారం. ఫైనల్ వెర్షన్ సిద్ధమయ్యాక ప్రకటన రావొచ్చు. వీటి సంగతలా ఉంచితే తమిళ దర్శకుడు హరి చెప్పిన స్టోరీకి రవితేజ సానుకూలంగా స్పందించారనే ప్రచారం జోరుగా తిరుగుతోంది. హరి కలవడంలో ఆశ్చర్యం లేదు కానీ మాస్ రాజా చాలా క్యాలికులేటెడ్ గా ఉంటున్న నేపథ్యంలో హరి అంటే కొంచెం రిస్క్ అవుతుంది.
ఎందుకంటే ఈయన గత ట్రాక్ రికార్డు ఏమంత ఆశాజనకంగా లేదు. విశాల్ తో తీసిన రత్నం రెండు భాషల్లోనూ ఫ్లాప్. అంతకు ముందు అరుణ్ విజయ్ ఏనుగు కూడా అంతంత మాత్రంగానే ఆడింది. విక్రమ్ స్వామి స్క్వేర్ పనవ్వలేదు. సింగం 3 కూడా యావరేజే. మొదటి రెండు భాగాలు సక్సెస్ కొట్టాక మళ్ళీ ఆ స్థాయి విజయం అందుకోలేదు. అలాంటప్పుడు ఇప్పుడు వేరే భాషలో హిట్ ఇస్తారని అంత గుడ్డిగా నమ్మలేం. కథ విపరీతంగా ఎగ్జైట్ చేస్తే తప్ప ఇది సాధ్యం కాదు.
అయినా మన హీరోలు ఫామ్ లో లేని కోలీవుడ్ డైరెక్టర్లతో జట్టు కట్టడం అంతగా కలిసి రాలేదు. రామ్ చరణ్ గేమ్ చేంజర్, నాగ చైతన్య కస్టడీ, రామ్ ది వారియర్ అన్నీ అవే బాపతే. మరి రవితేజ రిస్క్ తీసుకుని హరికి ఓకే చెబితే మాత్రం షాక్ అవుతుంది. మాములుగా అయితే రవితేజ ఇలాంటి లెక్కలన్నీ వేసుకోరు. నెరేషన్, కాంబినేషన్ నచ్చితే గ్రీన్ సిగ్నల్ ఇస్తారు. కానీ హరిది మాత్రం ప్రస్తుతానికి ప్రచారానికి పరిమితమయ్యింది కానీ ఇంకా అధికారిక ముద్ర పడలేదు.
