జూలై నెల… క్వాలిటీతో కాంపిటీషన్

జూన్ సగం అయిపోయింది. మా ఇంటి బంగారం లాంటి నోటెడ్ మూవీస్ తో పాటు దీవానా లాంటివి అంతో ఇంతో సౌండ్ చేయడానికి ప్రయత్నిస్తూ ప్రమోషన్ల మీద దృష్టి పెట్టాయి. నెలాఖరులో రావాల్సిన లెనిన్ వాయిదా పడటం దాదాపు కన్ఫర్మ్. కాకపోతే ఆ స్లాట్ ఎవరు తీసుకుంటారనే దాని మీద ఇంకా క్లారిటీ లేదు. తక్కువ టైం కాబట్టి ఇప్పటికిప్పుడు ఆ తేదీని లాక్ చేసుకునేందుకు చెప్పుకోదగ్గ సినిమాలేవీ పరుగులు పెట్టకపోవచ్చు. ఖాళీగా వదిలిస్తే వృధా అవుతుంది.

ఇక జూలై విషయానికి వస్తే ఈసారి క్వాలిటీతో పోటీ పడుతున్న చిత్రాల జాబితా ప్రేక్షకుల్లో ఆసక్తి రేపేలా ఉంది. సత్యదేవ్ జూలై 3 విడుదల కానున్న తన ‘రావు బహద్దూర్’ని ఏకంగా ఆర్ఆర్ఆర్, బాహుబలితో పోల్చడం చూస్తుంటే మాములు కాన్ఫిడెన్స్ అనిపించడం లేదు. టీమ్ మొత్తం అదే నమ్మకాన్ని వ్యక్తం చేస్తోంది. టీజర్ దానికి తగ్గట్టే చాలా వెరైటీగా అనిపించింది. ఫాంటసీ బ్యాక్ డ్రాప్ లో రూపొందిన ‘నాగబంధం’ని భారీ ఎత్తున ప్రమోట్ చేసేందుకు దర్శకుడు అభిషేక్ నామా ప్రణాళిక సిధ్దం చేసుకున్నారు.

హీరోకి ప్రత్యేకంగా మార్కెట్, ఇమేజ్ లేనప్పటికీ విజువల్స్ చూస్తుంటే ఇదేదో ఆషామాషీ విఎఫెక్స్ మూవీలా అనిపించడం లేదు. దిల్ రాజు లాంటి బయ్యర్లు హక్కులు కొనడం చూస్తే క్రేజీ కంటెంటే అనిపిస్తోంది. ఘట్టమనేని జయకృష్ణని లాంచ్ చేస్తున్న ‘శ్రీనివాస మంగాపురం’ని జూలై 9 విడుదలకు రెడీ చేస్తున్నారు. ఆరెక్స్ 100 ఫేమ్ అజయ్ భూపతి దర్శకత్వం వహించిన ఈ లవ్ యాక్షన్ డ్రామాలో కలెక్షన్ కింగ్ మోహన్ బాబు ప్రత్యేక పాత్ర పోషించారు.

జూలై 10 ఆనంద్ దేవరకొండ, వైష్ణవి చైతన్య ‘ఎపిక్’ విడుదల చేసే ప్లానింగ్ జరుగుతోంది. ఒకవేళ ఆ డేట్ సాధ్యం కాకపోతే వారం ముందుకు వెళ్లి జూలై 17 తీసుకొస్తారు. 90స్ మిడిల్ క్లాస్ బయోపిక్ ఫేమ్ ఆదిత్య హాసన్ దర్శకత్వం వహించారు. జూలై 24 కిరణ్ అబ్బవరం ‘చెన్నై లవ్ స్టోరీ’ని దించేందుకు ఏర్పాట్లు జరుగుతున్నాయట. కన్ఫర్మ్ చేయలేదు కానీ దాదాపు పక్కానే. జూన్ నుంచి తప్పుకున్న లెనిన్ కూడా జూలైలో వస్తే ఇక్కడ చెప్పిన ఎవరో ఒకరితో కాంపిటీషన్ తప్పదు.