Gulte Telugu Telugu Political and Movie News Updates
ఈ ఏడాది మోస్ట్ అవైటెడ్ చిత్రాల్లో ‘దురంధర్-2’ ఒకటనడంలో సందేహం లేదు. గత ఏడాది ఓ మోస్తరు అంచనాల మధ్య విడుదలైన ‘దురంధర్’ ఎవ్వరూ ఊహించని విధంగా ఏకంగా రూ.1400 కోట్ల వసూళ్లు రాబట్టింది. ఆ కథను ముగించకుండా మధ్యలో ఆపిన దర్శక నిర్మాత ఆదిత్య ధర్.. సినిమా చివర్లో ‘దురంధర్-2’కు లీడ్ ఇచ్చిన సంగతి తెలిసిందే.
మార్చి 19న రిలీజ్ అని కూడా అప్పుడే ప్రకటించాడు. ఐతే పార్ట్-2 మీద అంచనాలు భారీగా పెరిగిపోయిన నేపథ్యంలో ఇంత త్వరగా ‘దురంధర్-2’ను హడావుడిగా తీసుకురావడం కరెక్టేనా అని ముందు నుంచి ప్రశ్నలు తలెత్తుతున్నాయి. ఈ చిత్రం వాయిదా పడుతుందని గతంలో ప్రచారం కూడా జరిగింది. కానీ ఆదిత్య వెనక్కి తగ్గలేదు. మార్చి 19నే రిలీజ్ అని ప్రకటించాడు.
కానీ బాలీవుడ్లో ప్రస్తుతం మళ్లీ ‘దురంధర్-2’ వాయిదా గురించి డిస్కషన్ నడుస్తోంది. అక్కడి మీడియాలో కూడా దీని మీద వార్తలు వస్తున్నాయి. ఇప్పటికీ ‘దురంధర్-2’ షూట్ జరుగుతూనే ఉన్నట్లు సమాచారం. కొన్ని సన్నివేశాలను రీషూట్ కూడా చేస్తున్నారట. ఇటీవల ఊహించని విధంగా ‘బీఎంఎస్’ వివాదం ‘దురంధర్-2’ చిత్ర బృందాన్ని ఇరుకున పెట్టింది. దాని వల్ల షూట్కు కొన్ని రోజులు బ్రేక్ పడింది. ఆ సన్నివేశాలను ఇప్పుడు వీఎఫెక్స్లో చేసుకోవాల్సి వస్తోందట.
దీనికి తోడు పాటలు, బీజీఎం పనులు.. మిగతా పోస్ట్ ప్రొడక్షన్ వర్క్ కూడా ఆలస్యమవుతోందట. ఇంకో నెల రోజుల్లోపు సినిమాను డెలివర్ చేయడం చాలా కష్టమైన పనే అని యూనిట్ వర్గాలు అభిప్రాయపడుతున్నట్లు సమాచారం. ఈ హడావుడి వల్ల ఔట్ పుట్ మీద ప్రభావం పడుతుందని.. అందుకే కొంచెం టైం తీసుకుని మిడ్ సమ్మర్లో సినిమాను రిలీజ్ చేస్తే ఎలా ఉంటుందనే ఆలోచన చేస్తున్నారని.. కొన్ని రోజుల్లో ఏదో ఒక స్పష్టత వస్తుందని అంటున్నారు. ‘దురంధర్-2′ వాయిదా పడితే.. ‘టాక్సిక్’ మూవీకి అది పెద్ద అడ్వాంటేజ్ అవుతుందనడంలో సందేహం లేదు.
