ఇంకొంచెం కిక్కు కావాలి కింగ్

పాజిటివ్ టాక్, రివ్యూలతో సూపర్ హిట్ దిశగా వెళ్తున్న ఆంధ్రకింగ్ తాలూకాకు సంబంధించిన ఓపెనింగ్ ఫిగర్స్ నిర్మాణ సంస్థ నుంచి బయటికి రావడం లేదు కానీ గత రెండు రోజులు మంచి ఆక్యుపెన్సీలే నమోదవుతున్నాయి. అయితే మాములుగా ఈ స్థాయి టాక్ తెచ్చుకున్న సినిమాల కలెక్షన్లు ఒక్కసారిగా పెరిగిపోతాయి. వీకెండ్ టికెట్లకు డిమాండ్ ఓ రేంజ్ లో ఉంటుంది. కానీ రామ్ మూవీకి ఆ హడావిడి లేదు. హైదరాబాద్ లాంటి మెయిన్ సెంటర్స్ లోనూ వసూళ్లు క్రమంగా మెరుగుపడుతున్నాయి తప్పించి అదిరిపోయాయనే స్థాయిలో దూసుకుపోవడం లేదు. ఈ నేపథ్యంలో శని ఆదివారాలు కీలకం కానున్నాయి.

ప్రస్తుతానికి ఆంధ్రకింగ్ తాలూకా స్పీడ్ చూస్తుంటే నిదానమే ప్రధానం అన్నట్టుగా ఉంది. ఈ కిక్ అభిమానులకు సరిపోవడం లేదు. వరసగా నాలుగు ఫ్లాపుల తర్వాత వచ్చిన సక్సెస్ ఫుల్ మూవీ కావడంతో ఇది పెద్ద రేంజ్ కు వెళ్లాలని కోరుకుంటున్నారు. డిసెంబర్ 4 రాత్రి నుంచి అఖండ 2 తాండవం హడావిడి మొదలైపోతుంది. ఆలోగా రికవరీ పూర్తి చేసి లాభాల్లోకి వెళ్ళిపోవాలి. ఒకవేళ అఖండ 2కి బ్లాక్ బస్టర్ టాక్ వస్తే ఆ మేనియా ఇతర సినిమాల మీద ప్రభావం చూపిస్తుంది. రామ్, భాగ్యశ్రీ బోర్సేలు సరిగ్గా రిలీజ్ టైములో అమెరికా వెళ్లడం ప్రమోషన్స్ పరంగా ఇక్కడ ఎఫెక్ట్ అయ్యిందని నిర్మాతే చెప్పడం ఒప్పుకోవాల్సిన వాస్తవం.

థియేటర్ బిజినెస్ రీజనబుల్ గా చేయడం వల్ల బ్రేక్ ఈవెన్ టార్గెట్ ముప్పై కోట్ల లోపే ఉందని ట్రేడ్ టాక్. ఆదివారంలోపు దీంట్లో సగానికి పైగా వచ్చేస్తే టెన్షన్ ఉండదు. కంటెంట్ ని బాగా ప్రెజెంట్ చేసిన మహేష్ బాబు కొన్ని విషయాల్లో పడిన తడబాటు వల్ల యునానిమస్ అనిపించుకోలేదు. అయినా సరే ఫ్యామిలీ ఆడియన్స్ కి బాక్సాఫీస్ దగ్గర ఇదే ఫస్ట్ ఛాయస్ గా నిలుస్తోంది. ముఖ్యంగా మల్టీప్లెక్సుల్లో మంచి ఆదరణ కనిపిస్తోంది. సింగల్ స్క్రీన్లలో కూడా పికప్ బాగుంది. రామ్ హైదరాబాద్ తిరిగి రాగానే ఒక ఈవెంట్ తో పాటు సక్సెస్ టూర్ వెళ్లే ప్రతిపాదన ఉందట. చూడాలి మరి ఏం చేస్తారో.