ఓజీకి పవన్ ఎంత పుచ్చుకున్నాడు?

పవర్ స్టార్ పవన్ కళ్యాణ్ కెరీర్లోనే అత్యధిక అంచనాలతో రిలీజవుతున్న సినిమా.. ఓజీ. మూడేళ్ల ముందు మొదలైన ఈ సినిమా.. పవన్ పొలిటికల్, సినీ కమిట్మెంట్ల వల్ల ఆలస్యమై.. ఎట్టకేలకు కొన్ని నెలల ముందే చిత్రీకరణ పూర్తి చేసుకుంది. పోస్ట్ ప్రొడక్షన్ కార్యక్రమాలు పూర్తి చేసుకుని ఈ గురువారం ప్రపంచవ్యాప్తంగా విడుదల కానుంది. ముందు రోజు రాత్రి నుంచే తెలుగు రాష్ట్రాల్లో ప్రిమియర్స్ కూడా పడబోతున్నాయి. పవన్ చివరి చిత్రం ‘హరిహర వీరమల్లు’ తీవ్రంగా నిరాశపరచడంతో ఈ చిత్రంపై అభిమానులు భారీ ఆశలే పెట్టుకున్నారు.

‘వీరమల్లు’లా ఈ చిత్రానికి బడ్జెట్, బిజినెస్ పరంగా సమస్యలు రాలేదు. ‘వీరమల్లు’కు పవన్ తన పారితోషకం కూడా పూర్తిగా అందుకోలేని పరిస్థితి తలెత్తింది. రిలీజ్ తర్వాత లాభాలు వస్తే చూద్దాం అనుకున్న పవన్.. అందుకు అవకాశం లేక ఊరుకున్నాడు. ఐతే ‘ఓజీ’కి మాత్రం ఏ రకమైన ఇబ్బందీ లేదు. అనుకున్న దాని కంటే బడ్జెట్ పెరిగినప్పటికీ.. బిజినెస్ భారీగా జరగడంతో నిర్మాత మంచి లాభాలే అందుకున్నాడు. దీంతో పవన్‌కు ఆయన స్టార్ పవర్‌కు తగ్గట్లే పారితోషకం ఇచ్చినట్లు తెలుస్తోంది.

ఈ సినిమాకు పవన్ రూ.70 కోట్ల మేర రెమ్యూనరేషన్ తీసుకున్నాడట. ముందు అనుకున్న మొత్తం కంటే ఇది కొంచెం ఎక్కువే అని తెలుస్తోంది. సినిమాకు రూ.200 కోట్లకు పైగానే బడ్జెట్ అయినట్లు సమాచారం. ఇందులో మేకింగ్ కోసం పెట్టిన ఖర్చు సగమే. కానీ పారితోషకాలు, సినిమా మేకింగ్ ఆలస్యం కావడం వల్ల పడ్డ వడ్డీల భారమే ఎక్కువైంది. అయినా సరే ‘ఓజీ’కి ట్రేడ్ వర్గాల్లో విపరీతమైన డిమాండ్ రావడంతో నిర్మాతకు మంచి లాభాలే అందాయి.

సినిమా బిజినెస్ రూ.300 కోట్ల మార్కును టచ్ చేసినట్లు తెలుస్తోంది. ఇందులో డిజిటల్ హక్కులే రూ.100 కోట్లను మించిపోయాయి. బయ్యర్లు సినిమాపై భారీ పెట్టుబడులే పెట్టినప్పటికీ.. బ్రేక్ ఈవెన్ కష్టంగా ఏమీ అనిపించడం లేదు. సినిమాకు పాజిటివ్ టాక్ వస్తే మంచి లాభాలు కూడా అందుకోవచ్చు.