నిఖిల్ వేగం పెంచాల్సిన టైమొచ్చింది

యూత్ హీరో నిఖిల్ ఈ మధ్య బొత్తిగా కనిపించడం లేదు. కార్తికేయ 2 బ్లాక్ బస్టర్ సక్సెస్ తో ప్యాన్ ఇండియా ఇమేజ్ సంపాదించుకున్నాక ఒక్కసారిగా నెమ్మదించడం అభిమానులను టెన్షన్ పెడుతోంది. 18 పేజెస్ ఓ మోస్తరుగా బాగానే ఆడినా స్పై రూపంలో దక్కిన డిజాస్టర్ కొంచెం బ్రేక్ వేసింది. ఎప్పటి నుంచో నిర్మాణంలో ఉండి లేట్ గా రిలీజయ్యింది కాబట్టి ‘అప్పుడో ఇప్పుడో ఎప్పుడో’ని కౌంట్ లోకి వేసుకోకపోయినా ఫిల్మోగ్రఫీలో ఒక ఫ్లాప్ గా మిగిలిపోయింది. వీటిని మినహాయిస్తే ఒక పెద్ద హిట్టు తర్వాత నిఖిల్ చూసిన గ్యాప్ అక్షరాలా మూడు సంవత్సరాలు. ఇప్పటిదాకా కొత్త సినిమా రిలీజ్ డేట్ రాలేదు.

స్వయంభు మీద ఇండస్ట్రీ వర్గాల్లో పాజిటివ్ టాక్ నడుస్తోంది. పీరియాడిక్ సెటప్ లో చాలా పెద్ద బడ్జెట్ తో నిర్మిస్తున్నారు. నిఖిల్ దీనికోసం కత్తిసాము, మల్లయుద్ధం లాంటివి నిజంగా నేర్చుకుని డూప్స్ లేకుండా రిస్క్ చేశాడు. కానీ ఇప్పటిదాకా విడుదల తేదీ కానీ, షూటింగ్ ఎక్కడి దాకా వచ్చిందనే కబురు కానీ ప్రొడక్షన్ హౌస్ నుంచి రాలేదు. రామ్ చరణ్ నిర్మాతల్లో ఒకడిగా వ్యవహరిస్తున్న ది ఇండియా హౌస్ కూడా నిఖిల్ కు చాలా ప్రెస్టీజియస్ ప్రాజెక్ట్. కొన్ని వారాల క్రితం భారీ ఖర్చుతో వేసిన సెట్స్ వాటర్ ట్యాంకర్ డామేజ్ అవడం వల్ల మొత్తం కూలిపోయింది. దీంతో తాత్కాలికంగా బ్రేక్ ఇవ్వాల్సి వచ్చింది. తర్వాత నో అప్డేట్.

నిన్న ఏషియన్ సంస్థ ఒక సూపర్ హీరో మూవీ చేయబోతున్నట్టు కొత్త అనౌన్స్ మెంట్ ఇచ్చింది. దర్శకుడు, టీమ్ తదితర వివరాలు చెప్పలేదు కానీ నిఖిల్ ఖాతాలో మరో ప్యాన్ ఇండియా మూవీ తోడయ్యింది. వినడానికి ఇవన్నీ బాగానే ఉన్నాయి కానీ ఎప్పుడు వస్తాయో తెలిస్తే ఫ్యాన్స్ కొంత నిశ్చింతగా, బయ్యర్లు కొంచెం ప్లానింగ్ తో ఉండడానికి అవకాశముంటుంది. 2025లో నిఖిల్ రిలీజ్ లేనట్టే. 2026 సంక్రాంతికి ఆల్రెడీ స్లాట్స్ లాక్ అయిపోయాయి. వేసవికి పెద్ది, తారక్ – నీల్, ది ప్యారడైజ్, విశ్వంభర లాంటివి కాచుకుని ఉన్నాయి. మరి స్వయంభు ఏం చేస్తుందో ఎప్పుడు వస్తుందో అర్జెంట్ గా సమాధానం దొరకాల్సిన పెద్ద ప్రశ్న.