Gulte Telugu Telugu Political and Movie News Updates
తెలంగాణ పల్లె పాటల్లో ఉండే ఊపే వేరు. రోజుల తరబడి మ్యూజిక్ సిట్టింగ్స్ వేసి.. రిహార్సల్స్ చేసి.. అధునాతన సంగీత పరికరాలు వాడి.. పేరు మోసిన గాయకులతో పాడించి క్రియేట్ చేసే సినిమా పాటలు వాటి ముందు దిగదుడుపు అనిపిస్తాయంటే అతిశయోక్తి కాదు. బుల్లెట్ బండి.. ఓ పిలగ వెంకటేశ.. లాంటి పాటలు యూట్యూబ్లో కోట్లకు కోట్లు వ్యూస్ తెచ్చుకుని జనబాహుళ్యంలో ఎంతగా ఆదరణ పొందాయో తెలిసిందే. ఈ కోవలో చెప్పుకోవడానికి పదుల సంఖ్యలో పాటలున్నాయి.
ఈ మధ్య కాలంలో ఈ పాటల్లో అతి పెద్ద సెన్సేషన్ అంటే.. రాను బొంబాయ్కి రాను. సింపుల్ ట్యూన్.. అంతే సింపుల్ కొరియోగ్రఫీ.. కానీ కావాల్సినంత ఊపు.. ఇంకేముంది ఈ పాట యూట్యూబ్లో మోత మోగించేసింది. విడుదలైన నాలుగు నెలల్లోనే ఈ పాటకు ఏకంగా 40 కోట్ల వ్యూస్ రావడం విశేషం. ఈ పాట ఎంత పాపులర్ అంటే.. హిందీ టీవీ షోల్లో సెలబ్రెటీలు సైతం దీనికి స్టెప్పులు వేశారు. దేశ విదేశాల్లో ఈ పాట తిరుగులేని పాపులారిటీ సంపాదించింది. నాలుగు నెలల్లో 40 కోట్ల వ్యూస్ అంటే చిన్న విషయం కాదు.
కేవలం ఈ వ్యూస్ ద్వారా యూట్యూబ్ నుంచి వచ్చిన ఆదాయం కోటి రూపాయలు కావడం విశేషం. ఇంత తక్కువ వ్యవధిలో ఈ స్థాయి రీచ్ సంపాదించిన ఈ పాట.. మున్ముందు ఇంకా ఎక్కడికో వెళ్లిపోవడం ఖాయం. దీని మీద ఆదాయం కొనసాగుతూనే ఉంటుంది. ఒక చిన్న పల్లె జానపదంతో కోట్ల రూపాయల ఆదాయాన్ని కొల్లగొడుతోంది దీని టీం. ‘రాను బొంబాయ్కి రాను’ పాటను కళ్యాణ్ కీస్ అనే సంగీత దర్శకుడు ట్యూన్ చేయగా.. రాము రాథోడ్ లిరిక్స్ రాశాడు. రాముతో కలిసి ప్రభ అనే సింగర్ ఈ పాటను పాడింది. ‘ఓ పిలగ..’ పాటను కూడా ప్రభనే పాడింది.
