ఆమె ఒంటి పై స్ప్రే..అదిరేటి డ్రెస్సు..

ఫ్యాషన్ ప్రపంచంలో డిజైనర్లు ఎప్పటికప్పుడు సరికొత్త డ్రెస్సులతో తమ క్రియేటివిటీని చాటుకోవాలని ఉవ్విళ్లూరుతుంటారు. ప్రపంచంలోని అందమైన మోడల్స్, నటీమణులు, సెలబ్రిటీలు తమ డిజైనర్ దుస్తులను ధరించాలని ఆరాటపడుతుంటారు. ఈ క్రమంలోనే ఫ్యాషన్ రంగంలో రోజుకు కొత్త ఆవిష్కరణకు డిజైనర్లు ప్రయత్నిస్తుంటారు. ఆ దిశగా తాజాగా ప్రయోగాత్మకంగా ఓ సరికొత్త డ్రెస్ ను ఫ్యాబ్రికన్ కంపెనీ రూపొందించింది.

ఇప్పటివరకు డిజైనర్ దుస్తులను ఫ్యాక్టరీలలోను, షాపుల్లోనూ, ఆఫీసుల్లోనూ డిజైన్ చేయడం చూశాం…కానీ, తాజాగా ఆ కంపెనీకి చెందిన డిజైనర్లు లైవ్ లో ఓ వేదికపైనే సరికొత్త డ్రెస్ ను డిజైన్ చేశారు. అది కూడా ప్రముఖ మోడల్ బెల్లా హడిడ్ ఒంటిపై ఫ్యాబ్రిక్ స్ప్రేను(పాలిమర్) స్ప్రే చేసి దానితోనే డ్రెస్ ను తయారు చేయడం విశేషం. ప్యారిస్ ఫ్యాషన్ వీక్ సందర్భంగా వేదికపైనే బెల్లా శరీరంపై ఆ స్ప్రే ను స్ప్రే చేస్తూ స్ప్రే ఆన్ గౌన్ తయారుచేశారు.

వారు స్ప్రే చేసిన కొద్దిసేపటి తర్వాత ఆ పాలిమర్ స్ప్రే డ్రెస్ గా మారిపోయింది. మోడల్ శరీరాకృతి, సైజులకు అనుగుణంగా అప్పటికప్పుడు డ్రెస్సులు తయారుచేసేందుకు వీలుగా ఈ సరికొత్త ఫ్యాబ్రిక్ టెక్నాలజీని రూపొందించామని ఆ సంస్థ చెబుతోంది. ఇక, ఆరిపోయిన తర్వాత పాలిమర్ తో రూపొందించిన ఆ డ్రెస్సుకు సాగే గుణం కూడా ఉంటుందని, అది స్ట్రెచబుల్ అని వారు చెప్తున్నారు.

స్టేజిపై లైవ్ లోనే ఒక మోడల్ శరీరంపై డ్రెస్ రూపొందించిన ఈ వీడియో సోషల్ మీడియాలో వైరల్ అయింది. ఫ్యాషన్ డిజైనింగ్ రంగంలో ఈ ఫ్యాబ్రిక్ స్ప్రే డ్రెస్సు సరికొత్త ట్రెండుకు పలికింది అనడంలో ఎటువంటి సందేహం లేదు. అదిరేటి డ్రెస్సు మీరేస్తే…అంటూ సోషల్ మీడియాలో నెటిజన్లు కామెంట్స్ చేస్తున్నారు.