సీఎం కుర్చీ.... భార్య ఒత్తిడి...కేటీఆర్ క్లారిటీ

సీఎం కుర్చీ.... భార్య ఒత్తిడి...కేటీఆర్ క్లారిటీ

తెలంగాణ ముఖ్య‌మంత్రి కేటీఆర్ మ‌రోమారు ఆస‌క్తిక‌ర ప‌రిణామంతో వార్త‌ల్లో నిలిచారు. దేవుడు, భ‌క్తి అంటేనే పెద్ద‌గా ఆస‌క్తి చూప‌ని కేటీఆర్ తాజాగా తిరుమ‌ల ద‌ర్శ‌నం చేసుకోవ‌డం అంద‌రి దృష్టిని ఆక‌ర్షించిన సంగ‌తి తెలిసిందే. వైకుంఠ ఏకాదశిని పురస్కరించుకొని క‌లియుగ దైవం, కోరిన కోరిక‌లు తీసే దేవుడిగా పేరొంది తిరుమ‌ల‌ శ్రీవేంకటేశ్వర స్వామి వారిని కుటుంబ సమేతంగా దర్శనం చేసుకోవ‌డం చ‌ర్చ‌నీయాంశంగా మారింది. త్వ‌ర‌లో సీఎం కుర్చీ ఎక్కబోతున్నందుకే కేటీఆర్ తిరుమ‌ల వెళ్లారా? అనే విశ్లేష‌ణ‌లు సైతం జ‌రిగాయి. అయితే, దానికి తాజాగా కేటీఆర్ స‌మాధానం ఇచ్చారు.

కేటీఆర్ తొలిసారిగా మంత్రిగా ప్ర‌మాణ స్వీకారం చేసే స‌మ‌యంలో ఆయ‌న‌ తండ్రి కేసీఆర్ స‌హా మిగ‌తావారంతా `దైవ‌సాక్షిగా ప్ర‌మాణ‌స్వీకారం చేస్తున్నాను` అని పేర్కొంటే కేటీఆర్ ఒక్క‌రే ఆత్మ‌సాక్షిగా అని ప్ర‌క‌టించారు. అంత‌టి విభిన్న‌మైన వ్య‌క్తిత్వం ఉన్న కేటీఆర్... గ‌త వారం తిరుమ‌ల వెంక‌న్న‌ను కుటుంబ స‌మేతంగా సంద‌ర్శించుకున్నారు. కేటీఆర్‌కు ముఖ్య‌మంత్రిగా త్వ‌ర‌లో ప‌ట్టాభిషేకం త్వ‌ర‌లో జ‌ర‌గ‌నుంద‌నే ప్ర‌చారం నేప‌థ్యంలో... ఈ ద‌ర్శ‌న‌మా అనే చ‌ర్చ సహ‌జంగానే  తెర‌మీద‌కు వ‌చ్చింది. అయితే, ఈ ప్ర‌శ్న తాజాగా ఓ పాత్రికేయుడు సంధించ‌గా కేటీఆర్ ఆస‌క్తిక‌ర వివ‌రాలు తెలిపారు.

త్వరలో మీరు సీఎం అవుతారన్న ప్రచారం జరుగుతోందని కేటీఆర్‌ను ఓ పాత్రికేయుడు ప్ర‌శ్నించగా....``అదంతా మీడియాసృష్టే. మీరే రాస్తారు.. మీరే అడుగుతారు. అలాంటిదేం లేదు.`` అని తెలిపారు. మంత్రులు కూడా మాట్లాడుతున్నారని మ‌రింత రెట్టించ‌గా...``ఎవరూ.. నేరుగా మాట్లాడలేదు. ఏదో విషయం మీద ప్రెస్‌మీట్‌ పెడితే మీరే అడుగుతున్నరు. వారు చెప్పిన సమాధానంతో మీరు స్టోరీలు చేసుకుంటున్నరు. తెలంగాణలో ప్రతిపక్షం లేదు. మసాల న్యూస్‌ లేదు. అందుకే మీరు ఏదో ఒకటి సృష్టించి మసాలా తయారుచేస్తున్నరు.`` అంటూ మీడియాపై పంచులు వేశారు. నాస్తికుడైన మీరు ఇటీవల తిరుమల వెళ్ళడం ఈ చర్చను మరింత పెంచింది? అని స‌ద‌రు పాత్రికేయుడు లాజిక్‌తో ప్ర‌శ్నించ‌గా...``నాకు కుటుంబం ఉంది. భార్యా, పిల్లల నుండి ప్రెషర్‌ ఉంటది. ఒక్కోసారి వినాలి కదా. దానికి దీనికి ఎలాంటి సంబంధం లేదు.`` అంటూ ముక్తాయించారు.


 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English