యడ్యూరప్పని సీఎం కాకుండా చేస్తున్న రూల్ 75

యడ్యూరప్పని సీఎం కాకుండా చేస్తున్న రూల్ 75

కుమారస్వామి ప్రభుత్వాన్ని కూల్చడానికి అహర్నిశలూ పనిచేసి మొత్తానికి అనుకున్న ఫలితం సాధించిన కర్ణాటక మాజీ సీఎం, బీజేపీ సీనియర్ నేత యడ్యూరప్పకు ఆ ఫలితాలు అందుకునే పరిస్థితులు మాత్రం కనిపించడంలేదు. కర్ణాటకలో బీజేపీ ప్రభుత్వం ఏర్పడుతున్నా సీఎంగా మాత్రం యడ్యూరప్పకు బదులు మరో నేతను నియమించే సూచనలు కనిపిస్తున్నాయి. కేంద్రంలో మంత్రిగా ఉన్న అనంతకుమార హెగ్డేను సీఎం చేస్తారని ప్రచారం జరుగుతోంది.

యడ్యూరప్ప సీఎం కావాలని ఎక్కువ మంది బీజేపీ ఎమ్మెల్యేలు కోరుకుంటున్నప్పటికీ, ఆర్ఎస్ఎస్ మాత్రం ససేమిరా అంటోందట. దీంతో బీజేపీ అధిష్ఠానం కొత్త పేర్లను పరిశీలిస్తోంది. ఈ నేపథ్యంలో సీనియర్ నేత, ప్రస్తుతం ఎంపీగా ఉన్న అనంతకుమార్ హెగ్డే పేరును అమిత్ షా పరిశీలిస్తున్నట్టు తెలుస్తోంది. ఇదే సమయంలో ఎమ్మెల్యేలు శ్రీరాములు, ఉదాసి, అశోక్ లలో ఇద్దరికి ఉప ముఖ్యమంత్రి పదవులు ఇవ్వాలని కూడా బీజేపీ పెద్దలు భావిస్తున్నట్టు సమాచారం.

అయితే.. యడ్యూరప్పకు సీఎం పదవి ఇవ్వకపోతే అసంతృప్తులు పెరిగే ప్రమాదముందన్న వాదనను మోదీ-షా ద్వయం వినిపిస్తోందట. ఆరెస్సెస్ మాత్రం 75 ఏళ్ల వయో నిబంధన పెట్టి అడ్వాణీ, జోషీ వంటివారిని పదవులకు దూరం చేసినప్పుడు అదే నిబంధన యడ్డీకి కూడా వర్తించాలని.. లేదంటే పార్టీలోని నియమనిబంధనలకు విలువ లేకుండా పోతుందన్న వాదన వినిపిస్తోందట.

కాగా.. కథ అడ్డం తిరిగే సూచనలు కనిపిస్తుండడంతో యడ్డీ ఆరెస్సెస్‌న ప్రసన్నం చేసుకునే పనిలో పడ్డారు. బెంగళూరు చామరాజపేటలోని ఆర్‌ఎస్ఎస్‌ ప్రధాన కార్యాలయ భవనమైన 'కేశవశిల్ప'కు వచ్చిన యడ్యూరప్ప, అక్కడి ప్రముఖులతో దాదాపు గంటపాటు మంతనాలు జరిపారు. ఆర్ఎస్ఎస్ పెద్దల ఆశీర్వాదం కోసమే తాను వచ్చానని, ఇంతకాలం తాను ఆర్‌ఎస్ఎస్‌ నీడలోనే ఎదిగానని ఈ సందర్భంగా ఆయన వ్యాఖ్యానించడం గమనార్హం. మరి.. ఆరెస్సెస్‌ను యడ్డీ మెప్పించగలరా లేదంటే పార్టీ రిటైర్మెంట్ నిబంధన కారణంగా ముఖ్యమంత్రి పదవి అందుకోలేక నిరాశపడతారా చూడాలి.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English