మోదీ మాట..మీకు మంత్రి ప‌ద‌వి అంటే న‌మ్మ‌కండి

మోదీ మాట..మీకు మంత్రి ప‌ద‌వి అంటే న‌మ్మ‌కండి

ప్ర‌ధాన‌మంత్రి న‌రేంద్ర మోదీ చాతుర్యం గురించి ప‌రిచయం చేయ‌న‌క్క‌ర్లేదు. సంద‌ర్బంగా ఏదైనా త‌న మార్కు కామెంట్లు చేసే మోదీ తాజాగా పార్లమెంట్ సెంట్రల్ హాల్‌లో జరిగిన సమావేశంలో ఎన్డీయే భాగస్వామ్య పక్ష ఎంపీలతో ముచ్చ‌టించిన సంద‌ర్భంగా అదే త‌ర‌హాలో ఆస‌క్తిక‌ర వ్యాఖ్య‌లు చేశారు. కేబినెట్ ఏర్పాటు పై రకరకాల కథనాలు వస్తుంటాయని, ఎంపీలను గందరగోళానికి గురిచేసేలా ఉంటాయని మోదీ పేర్కొంటూ..ఈ విష‌యంలో ఫోన్ వ‌స్తే న‌మ్మ‌వ‌ద్ద‌న‌ని అన్నారు. ఆఖ‌రికి ప్ర‌ధాన‌మంత్రి కార్యాల‌యం పేరును చెప్పినా క్రాస్ చెక్ చేసుకోవాల‌న్నారు.  

ఎన్టీఏ భాగ‌స్వామ్య ప‌క్షాల స‌మావేశంలో త‌మ కూటమి నేతగా నరేంద్రమోదీని ఏకగ్రీవంగా ఎన్నుకున్నారు. మోదీ పేరును బీజేపీ అధ్యక్షుడు అమిత్ షా ప్రతిపాదించగా, పార్టీ మాజీ అధ్యక్షులు రాజ్‌నాథ్ సింగ్, నితిన్‌గడ్కరీ బలపరిచారు. ముఖ్య భాగస్వామ్యపక్ష నేతలైన జేడీయూ అధ్యక్షుడు నితీశ్ కుమార్, శివసేన అధినేత ఉద్దవ్ ఠాక్రే, శిరోమణి అకాలీదళ్ అధ్యక్షుడు ప్రకాశ్ సింగ్ బాదల్‌లు తమ పార్టీల మద్దతును తెలియజేశారు. ఈ సంద‌ర్భంగా ప‌లువురు ఎంపీల‌తో మోదీ ఇష్టాగోష్టిగా మాట్లాడుతూ, . ‘‘ఇప్పుడు అందరిలో జరిగే చర్చ కేంద్ర కేబినెట్ ఏర్పాటుపైనే. మీకు పీఎంవో పేరిట ఎవరైనా ఫోన్ చేసి.. మీ పేరు మంత్రుల లిస్టులో ఉందని చెప్పొచ్చు. రాష్ట్రపతికి ఇచ్చిన లిస్టులో కూడా ఉందని నమ్మించొచ్చు. మీడియాలో వార్తల మీద వార్తలు రావొచ్చు. అది మనను అయోమయానికి, గందరగోళానికి గురిచేస్తుంది . మీకు మంత్రి పదవి వచ్చినట్లు సాక్షాత్తు పీఎంవో నుంచి ఫోన్ వచ్చినా ఒకటికి రెండు సార్లు వెరిఫై చేసుకోండి” అని ఎంపీలకు సూచించారు.

ఈ సంద‌ర్భంగా పార్టీ శ్రేణుల‌కు ఆయన హిత‌బోధ చేశారు. ప్రధాని, మంత్రి పదవులు ముఖ్యంకాదని, ఎన్నుకున్న ప్రజల ఆకాంక్షలు నెరవేర్చడమే ముఖ్యమని అన్నా రు. ‘‘నేను మీలో ఒక్కడిని. మీతో పాటు ఎంపీని. మీతోపాటు కార్యకర్తను . నాకు, మీకు ఎలాంటి తేడా లేదు. అందరం కలిసి పనిచేద్దాం ” అని సూచించారు. 1857 స్వాతంత్య్ర పోరాటాన్ని ఉటంకిస్తూ.. స్వపరిపాలన కోసం నాడు అన్ని వర్గాల ప్రజలు చేతులు కలిపారని, 2020 నాటికి స్వాతంత్య్రం సిద్ధించి 75 వసంతాలు పూర్తికానున్న నేపథ్యంలో సుపరిపాలన కోసం నేడు అలాంటి ఉద్యమ స్ఫూర్తే అవసరం అని ప్రధాని చెప్పారు. రాజ్యాంగమే మనకు సుప్రీం. ఇంట్లో మనం ఎలాంటి రకమైన పూజా పద్ధతిని అనుసరించినా.. ఇంటి వెలుపల మాత్రం భారత మాతకు మించిన దైవం వేరే ఉండదు అని చెప్పారు.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English