కేసీఆర్‌, క‌విత పిటిష‌న్లు వేసిన‌పుడు ఎక్క‌డున్నావు కేవీపీ?

కేసీఆర్‌, క‌విత పిటిష‌న్లు వేసిన‌పుడు ఎక్క‌డున్నావు కేవీపీ?

పోల‌వ‌రం ప్రాజెక్టుపై రాజ్య‌స‌భ స‌భ్యుడు కేవీపీ రామ‌చంద్ర‌రావు, మాజీ ఎంపీ ఉండ‌వ‌ల్లి అరుణ్‌కుమార్ చేసిన కామెంట్ల‌పై మంత్రి దేవినేని ఉమామహేశ్వరరావు ఘాటుగా స్పందించారు. విజయవాడలో ఆయ‌న మీడియాతో మాట్లాడుతూ ఆస‌క్తిక‌రంగా వ్యాఖ్య‌లు చేశారు. పోలవరం పనులన్నీ వేగవంతం చేయడానికి ముఖ్యమంత్రి క్షేత్రస్థాయి పర్యటన చేప‌ట్టార‌ని వెల్ల‌డించారు.

పోల‌వ‌రం ప్రాజెక్టులో 70 శాతానికి పైగా పనులు పూర్తయ్యాయని, అప్పర్ కాపర్, లోయర్ కాపర్ డాం నిర్మాణాలు వేగవంతం చేయాలని సీఎం సూచించారని అన్నారు. పోలవరం ప్రాజెక్టు అథారిటీ ఆధ్వర్యంలో పనులు వేగంగా జరుగుతున్నాయని, సుమారు 500 మంది ఇంజినీర్లు డ్యాం సైట్లో పనిచేస్తున్నారని వెల్ల‌డించారు. కొన్ని వందల మంది కార్మికులు నిత్యం పనిచేస్తున్నార‌ని, నిపుణులు, ఇంజినీర్లు సమక్షంలో పనులు సాగుతున్నాయని వివ‌రించారు.

తెలంగాణ సీఎం కేసీఆర్ ఏదో రకంగా పోలవరానికి నిధులు సమకూరకుండా అడుగడుగునా అడ్డుపడుతున్నారని దేవినేని మండిప‌డ్డారు. భద్రాచలం మునిగిపోతుందని కేసీఆర్ కేసులు వేస్తున్నారని, అయినా కేసీఆర్ ఇచ్చే కాసుల కోసం జగన్ నోరు విప్పరని ఆరోపించారు. దేవాలయాలు మునిగిపోతాయని చేబుతున్న కేసీఆర్ ఆనాడు ఏంచేశారని ప్ర‌శ్నించారు. వైఎస్ హయాంలో లబ్ది పొందిన వారంతా అక్కడ టీఆర్ఎస్‌లో ఇక్కడ వైకాపాలో చేరారని గుర్తు చేశారు.

కేసీఆర్, కవిత పోలవరానికి వ్యతిరేకంగా పిటిషన్లు వేసినప్పుడు కేవీపీ ఎందుకు స్పందించలేదని దేవినేని సూటిగా ప్ర‌శ్నించారు. కొంతమంది రాజమండ్రి కొట్టుకు పోతుందని అసత్యాలు చెబుతున్నారని మాజీ ఎంపీ ఉండ‌వ‌ల్లి అరుణ్‌కుమార్‌పై మండిప‌డ్డారు. అలాంటి వారికి వైకాపాపై ప్రేమ ఉంటే పార్టీలో చేరాలే కానీ ఇలా ప్రజలను పక్కదారి పట్టించొద్దన్నారు. జ‌గ‌న్ త‌మ‌ను ఆద‌రిస్తాడో లేదో అనే భ‌య‌మే వారిని పార్టీలో చేర‌నివ్వ‌డం లేదా అని ప్ర‌శ్నించారు.

ఒక్కసారి కూడా డాం చూడకుండానే సాక్షిలో అసత్యాలు, అవాస్తవాలు ప్రచారం చేస్తున్నారని దేవినేని ఉమామ‌హేశ్వ‌ర‌రావు ఆగ్ర‌హం వ్య‌క్తం చేశారు. వైఎస్ పోలవరం కట్టారని చెబుతున్నారని అయితే, ఆయ‌న మట్టి పనులు చేసి కోట్లు దండుకున్నారని విరుచుకుప‌డ్డారు. జగన్‌కు లబ్ది చేకూర్చడానికి కేవీపీ శతవిధాలా ప్రయత్నించారని, పోలవరం పవర్ ప్రాజెక్టు పనులు చేపట్టాలని ప్రయత్నించారని తెలిపారు. ఆయ‌న‌ దుర్బుద్ధి కారణంగా పోలవరం పనులు రెండేళ్లకు పైగా ఆగిపోయాయని వివ‌రించారు.

జగన్ కనుసన్నల్లో ఇక్కడ రాజమండ్రిలో ఉండవల్లి, ఢిల్లీలో కేవీపీ నాటకాలాడుతున్నారని మండిప‌డ్డారు. కోట్ల మంది ప్రజలు, రైతుల గుండె చప్పుడు పోలవరం అని పేర్కొంటూ అనవసరంగా ప్రాజెక్టు జోలికి రావొద్దని హిత‌వు ప‌లికారు. పోలవరానికి రావలసిన నిధులను కేంద్రంలో ఏర్పడే కొత్త ప్రభుత్వం నుంచి సాధించుకుంటామ‌ని ఆయ‌న స్ప‌ష్టం చేశారు.


 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English