ఇది కుమారస్వామి రిటర్న్ గిఫ్టా?

ఇది కుమారస్వామి రిటర్న్ గిఫ్టా?

ఇరుగుపొరుగు రాష్ట్రాల మ‌ధ్య ఇచ్చిపుచ్చుకునే ధోర‌ణి చాలా అవ‌స‌రం. కొన్ని సంద‌ర్భాల్లో త‌మ‌కున్న ఇబ్బందిని తీర్చాల‌ని ప‌క్క రాష్ట్రాల్ని అడిగిన‌ప్పుడు.. అవి సానుకూలంగా స్పందిస్తే ఎంత‌టి సృహ‌ద్భావ వాతావ‌ర‌ణం నెల‌కొంటుందో తాజా ప‌రిణామాల్ని చూస్తే ఇట్టే అర్థం కాక మాన‌దు.

ఉమ్మ‌డి మ‌హ‌బూబ్ న‌గ‌ర్ జిల్లాలో తాగునీటి ఎద్ద‌డి తీవ్రంగా ఉంది. దీంతో.. తెలంగాణ రాష్ట్ర ముఖ్య‌మంత్రి క‌ర్ణాట‌క ప్ర‌భుత్వాన్ని కోరిన విన్న‌పంపై క‌ర్ణాట‌క ముఖ్య‌మంత్రి కుమార‌స్వామి సానుకూలంగా స్పందించిన వైనం ఇప్పుడు ఆస‌క్తిక‌రంగా మారింది. క‌ర్ణాట‌క‌లోని నారాయ‌ణ‌పూర్ రిజ‌ర్వాయ‌ర్ నుంచి 3 టీఎంసీల నీటిని జూరాల‌కు విడుద‌ల చేయాలంటూ కేసీఆర్ స‌ర్కారు కోరింది.

దీనిపై స్పందించిన క‌ర్ణాట‌క‌.. అధికారుల‌తో స‌మీక్ష జ‌రిపి.. తెలంగాణ ప్ర‌భుత్వ విన్న‌పంపై సానుకూలంగా స్పందించారు. త‌న‌కు తాను స్వ‌యంగా కేసీఆర్ కు ఫోన్ చేసి మ‌రీ స్వీట్ న్యూస్ చెప్పారు. తెలంగాణ ప్ర‌భుత్వం కోరిన‌ట్లే.. రెండున్న‌ర టీఎంసీల నీటిని క‌ర్ణాట‌క‌లోని నారాయ‌ణ‌పూర్ రిజ‌ర్వాయ‌ర్ నుంచి జూరాల‌కు విడుద‌ల చేయ‌నున్న‌ట్లు చెప్పారు.

నీటి విడుద‌ల విష‌యంలో గ‌తంలో ఇరుగుపొరుగు రాష్ట్రాల మ‌ధ్య ఘ‌ర్ష‌ణ వాతావ‌ర‌ణం ఉండేది. ఇప్పుడు అందుకు భిన్నంగా ఇచ్చిపుచ్చుకునే రీతిలో వ్య‌వ‌హ‌రిస్తూ ఉండ‌టం వ‌ల్ల రాష్ట్రాల మ‌ధ్య అనుబంధం మ‌రింత పెరుగుతుంద‌న‌టంలో సందేహం లేదు. నిజానికి క‌ర్ణాట‌క ముఖ్య‌మంత్రి ఈ నిర్ణ‌యం తీసుకోవ‌టానికి కార‌ణం గ‌తంలో కేసీఆర్ చూపిన చొర‌వ‌గా చెప్ప‌క త‌ప్ప‌దు.

ఎందుకంటే.. గ‌త ఏడాది క‌ర్ణాట‌క విన్న‌పాన్ని కేసీఆర్ మ‌న్నించ‌టంతో.. తాజాగా క‌ర్ణాట‌క ప్ర‌భుత్వం అంతే పెద్ద మ‌న‌సుతో సానుకూలంగా స్పందించిన‌ట్లుగా చెప్ప‌క‌త‌ప్ప‌దు. గ‌త ఏడాది తుంగ‌భ‌ద్ర జిల్లాల్లో ఆర్డీఎస్ వాటా నుంచి ఒక టీఎంసీ నీటిని క‌ర్ణాట‌క వాడుకోవ‌టానికి వీలుగా కేసీఆర్ స‌ర్కారు నిర్ణ‌యం తీసుకుంది. దీంతో.. అప్ప‌ట్లో వారి నీటి ఇబ్బంది కొంత‌మేర ప‌రిష్కార‌మైంది. తాజాగా మ‌హ‌బూబ్ న‌గ‌ర్ జిల్లాలోని రిజ‌ర్వాయ‌ర్ల‌లో నీటి మ‌ట్టాలు త‌గ్గిపోయి.. తాగునీటికి ఇబ్బంది ఏర్ప‌డిన వేళ‌.. దీనికి చెక్ పెట్టేందుకు క‌ర్ణాట‌క‌ను మూడు టీఎంసీల నీటిని కోరితే.. 2.5టీఎంసీల నీటిని ఇచ్చేందుకు ఓకే చెప్పింది. ఇలా ఇచ్చిపుచ్చుకునే ధోర‌ణితో అంత‌ర్రాష్ట్ర జ‌ల స‌మ‌స్య‌లు ప‌రిష్కార‌మ‌వుతాయ‌ని చెప్ప‌క త‌ప్ప‌దు.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English