యతి కాదు ఎలుగుబంటి.. నేపాల్ ఆర్మీ కౌంటర్

యతి కాదు ఎలుగుబంటి.. నేపాల్ ఆర్మీ కౌంటర్

యతి పాదముద్రలు చూశామన్న ఇండియన్ ఆర్మీ క్లెయిమ్‌ను నేపాల్ ఆర్మీ ఖండించింది. అవి యతి పాదముద్రలు కావని... ఆ ప్రాంతంలో తిరుగుతున్న మంచు ఎలుగుబంటి పాదముద్రలు కావొచ్చని అనుమానం వ్యక్తం చేసింది.  భారత ఆర్మీ వాటిని గుర్తించిన ప్రాంతంలో ఎలుగుబంట్లు తరచూ సంచరిస్తుంటాయని తెలిపింది.

 హిమాలయాల్లో సాహసయాత్రకు వెళ్లిన భారత సైనికుల బృందం ఏప్రిల్‌ 9న మకలు బేస్‌ క్యాంప్‌ సమీపంలో భారీ అడుగులను గుర్తించింది. 32 అంగుళాల పొడవు, 15 అంగుళాల వెడల్పుతో ఉన్న ఈ పాదముద్రలు కచ్చితంగా ‘యతి’వే అయి ఉంటాయని ఇండియన్ ఆర్మీ ట్విట్ చేసింది. గతంలోనూ మకాలు-బరూన్‌ నేషనల్‌ పార్క్‌ సమీపంలో యతి అడుగులు కన్పించినట్లు సైన్యం తెలిపింది. ఇందుకు సంబంధించిన ఫొటోలను కూడా ఆర్మీ ట్విటర్‌లో పోస్టు చేసింది.

అయితే నేపాల్ ఆర్మీ ఈ ప్రకటనను తోసిపుచ్చింది. ఈ పాదముద్రలను భారత్ ఆర్మీ గుర్తించిన సమయంలో నేపాల్ ఆర్మీకి చెందిన లియైజన్‌ బృందం కూడా ఉందని బ్రిగేడియర్‌ జనరల్ విజ్ఞాన్‌ దేవ్ పాండే మీడియాకు వెల్లడించారు. ‘స్థానికులు, పోర్టర్లు వెల్లడించిన ప్రకారం అవి ఎలుగుబంటి పాద ముద్రలు. అవి ఆ ప్రాంతంలో తరచూ కనిపిస్తాయి’ అని ఆయన తెలిపారు.

భారత్ ఆర్మీ ఈ పాదముద్రలు చూసిన ప్రాంతం నిజానికి భారత భూభాగంలో కానీ, భారత సరిహద్దుల్లో కానీ లేదు. నేపాల్, చైనా సరిహద్దుల్లో మన దేశానికి చెందిన సిక్కింకు ఎగువ భాగాన ఉంది. అక్కడకు ట్రెక్కింగ్‌కు వెళ్లిన ఇండియన్ ఆర్మీ ఈ పాదముద్రలు చూసి ట్వీట్ చేసింది,

కాగా.. ఇండియన్ ఆర్మీ చూసిన పాదముద్రలు యతివి కావడానికి అవకాశాలున్నాయన్న వాదనలు ఇప్పటికీ వినిపిస్తున్నాయి. ఇండియన్ ఆర్మీ ఏమీ యతి అనేది పురాణ పాత్రగా చెప్పలేదు. భూమి మీద చీమలు, ఏనుగులు ఉన్నట్లే... కాకులు, అంతరించిపోతున్న రాబందులు ఉన్నట్లే మనం ఎన్నడూ చూడని భారీ కోతి జాతి జంతువు ఒకటి ఉండే అవకాశం ఉండొచ్చు. వాటి సంఖ్య తక్కువగా ఉండడం వల్ల... మనుష్య సంచారం లేని ప్రాంతంలో ఉండడం వల్ల అవి మనుషులకు కనిపించకపోవచ్చన్న వాదన ఉంది.

మరోవైపు రష్యాలోని సైబీరియా ప్రాంతం, చైనాకు ఎగువన మంగోలియా ప్రాంతంలోనూ మంచు ప్రదేశాల్లో యతి వంటి భారీ జంతువుకు సంబంధించిన చర్చలు జరుగుతుంటాయి. కాబట్టి పేరు ఏదైనా కానీ ఒక భారీ కోతి, మనిషిని పోలిన జంతువు ఉంటే ఉండొచ్చని ఆంత్రోపాలజీ నిపుణులు చెబుతున్నారు.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English