హరీష్‌కు పొగబెడతారా...!?

హరీష్‌కు పొగబెడతారా...!?

తెలంగాణ ముందస్తు ఎన్నికలలో సాధించిన ఘన విజయం తెలంగాణ రాష్ట్ర సమితిలో చిచ్చు రేపనుందా..? ఆ పార్టీ అధ్యక్షుడు కల్వకుంట్ల చంద్రశేఖర రావు తీసుకుంటున్న నిర్ణయాలు పార్టీలో ముసలం పుట్టించనున్నాయా..? తాజా పరిస్ధితులను చూస్తుంటే అది నిజమే అనిపిస్తున్నాయి అంటున్నారు రాజకీయ పరిశీలకులు. ముఖ్యమంత్రిగా కె. చంద్రశేఖర రావు ప్రమాణ స్వీకారం చేసిన వెంటనే వడివడిగా కీలక నిర్ణయాలు తీసుకుంటున్నారు. ఇందులో భాగంగా తన కుమారుడు కల్వకుంట్ల తారక రామారావును కార్యనిర్వాహక అధ్యక్షుడిగా నియమించారు.  ఇది పార్టీ సీనియర్లతో కాని అనుంగు అనుచరులతో కాని చర్చించి తీసుకున్న నిర్ణయం కాదు. తానొక్కడే తీసుకున్న కీలక నిర్ణయమని పార్టీ వర్గాలు చెబుతున్నాయి.

తెలంగాణలోని భారీ నీటి పారుదల ప్రాజెక్టులపై ఉన్నతాధికారులతో జరిపిన సుదీర్ఘ సమావేశం కూడా పార్టీలో చిచ్చు రేపనుందంటున్నారు. గత ప్రభుత్వంలో భారీ నీటి పారుదల శాఖ మంత్రిగా హ‌రీష్‌రావు పనిచేశారు. అనేక సందర్బాలలో హారీష్‌రావు పనితీరుపై  ముఖ్యమంత్రి కెసీఆర్ ప్రశంసల జల్లు కురిపించారు. హరీష్‌ రావు ప్రాజెక్టుల వద్దే పడుకున్నారని, అవి పూర్తీ అయ్యేవరకూ విశ్రమించ లేదని బహిరంగా సభలలో కొనియాడారు. ఇంత చేసినా కొత్త ప్రభుత్వంలో తొలిసారి జరిపిన భారీనీటి పారుదల సమావేశానికి హరీష్‌రావును ఆహ్వానించలేదు. ఇది ఆయనను అవమానించడమేనని హ‌రీష్‌ రావు అనుచరులు భావిస్తున్నారు.

తన కుమారుడికి అధ్యక్ష పద‌వి కట్టబెట్టిన కేసీఆర్ హ‌రీష్‌ రావుకు ఈ సారి మంత్రి వర్గంలో అవకాశం ఇవ్వరేమోనని ఆయన వర్గీయులు ఆందోళన చెందుతున్నారు. కేటీఆర్‌కు భవిష్యత్తులో హ‌రీష్‌ రావు నుంచి  ఎలాంటి ఇబ్బంది ఎదురుకాకుండా ఇప్పటి నుంచే సైడ్‌ట్రాక్‌లో పెట్టాలని కేసీఆర్ భావిస్తున్నట్లు చెబుతున్నారు. దీనిని ముందే గమనించినా హ‌రీష్‌ రావు ప్రస్తుతానికి ఎలాంటి చర్యలు తీసుకోకుండా నిశ్శ‌బ్దంగా ఉండాలని తన అనుచరుల వద్ద చెబుతున్నట్లు సమాచారం.

తెలంగాణ ముందస్తు ఎన్నికలలో బొటాబొటీగా గెలిచి ఉంటే.. ఈ పరిస్దితులు వచ్చి ఉండేవి కాదని.. భారీగా మెజారిటీ రావడంతో కేసీఆర్‌కు అడ్డు లేకుండా పోయిందని, పార్టీలో కొన్ని వర్గాలు పేర్కంటున్నాయి. హరీష్‌ రావుకు తొలి నుంచి పార్టీలో మంచి పట్టుంది, ఆయన తన వెంట  కొందరి ఎమ్మెల్యేలను, నాయకులను తీసుకు పోగలరు అన్న పేరు ఉంది. ముందస్తు ఎన్నికలలో బొటాబొటి విజయం సాధిస్తే హరీష్‌ రావు నుంచి ఈ ప్రమాదం వస్తుందని అందరూ భావించారు. అయితే పరిస్దితులు తారుమారు అయ్యాయి. దీంతో మొత్తం పవర్‌ అంతా కేసీఆర్ వద్దే కేంద్రీక్రుతమయ్యింది. ఈ పరిస్ధితులలో హరీష్ రావు ఎలాంటి వ్యతిరేక చర్యలకు పాల్పడే అవకాశం లేదంటున్నారు. వీటన్నింటిని పరిగణలోకి తీసుకున్న కేసీఆర్ చాల తెలివిడతో వ్యవహరిస్తున్నారని రాజకీయ పరిశీలకులు అంటున్నారు.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English