బిగ్ బాస్ బ్యూటీ అరెస్ట్.. బెయిల్ రాక తిప్పలు!

ఇండస్ట్రీలో ఉన్న దళితులను తరిమేయాలని.. వారి కారణంగానే సరైన సినిమాలు రావడం లేదని బిగ్ బాస్ ఫేమ్ మీరా మిథున్ సంచలన కామెంట్స్ చేసిన సంగతి తెలిసిందే. ఆమె చేసిన ఈ వ్యాఖ్యలు దుమారాన్ని రేపాయి. షెడ్యూల్డ్ కులాల వారు మీరా మిథున్ పై కేసులు పెట్టారు. ఎస్సీ, ఎస్టీ ప్రివెన్షన్ ఆఫ్ అట్రాసిటీ యాక్ట్ కింద సెక్షన్ 153A(1)(a), 505(1)(b), 505 (2) ప్రకారం ఆమెపై కేసులు నమోదయ్యాయి. మీరా మిథున్ ని అరెస్ట్ చేయడం ఖాయమని అన్నారు.

దీంతో ఆమె మరింత రెచ్చిపోయింది. ఏకంగా పోలీసులకు సవాలు విసురుతూ హాట్ కామెంట్స్ చేసింది. తనను అరెస్ట్ చేయడమనేది కలలో కూడా జరగదని.. పోలీసులకు దమ్ముంటే తనను అరెస్ట్ చేసి చూపించమంటూ ట్వీట్ చేసింది. ఈ ట్వీట్లు బాగా వైరల్ అయ్యాయి. సోషల్ మీడియాలో ఇన్ని మాటలు చెప్పిన మీరా మిథున్ తనను అరెస్ట్ చేసే సూచనలు ఉన్నాయని గ్రహించి ముందుగానే భయపడి పారిపోయింది.

ఆమె కోసం అన్ని ప్రాంతాలు వెతికిన పోలీసులు కేరళలో ఉన్నట్లు గుర్తించారు. వెంటనే సైబర్ క్రైమ్ పోలీసులు కేరళకు వెళ్లి ఆమెని అరెస్ట్ చేశారు. ఆ తరువాత చెన్నైకి తీసుకొచ్చి రిమాండ్ కి తరలించారు. దీంతో ఆమె బెయిల్ కోసం అప్లై చేస్తూ కోర్టులో పిటిషన్ దాఖలు చేసింది. ఆమె స్నేహితుడు కూడా పిటిషన్ దాఖలు చేశారు. వీటిపై విచారణ చేపట్టిన కోర్టు.. ఆమె బెయిల్ కి నిరాకరించింది. దీంతో ఆమె మరికొన్ని రోజులు జైల్లోనే ఉండాల్సిన పరిస్థితి ఏర్పడింది. తదుపరి విచారణ జరిగే వరకూ మీరా మిథున్ కి ఈ తిప్పలు తప్పవు!