మోడీ బుల్లెట్ రైల్‌...సముద్రంలోంచి వెళుతుంది

మోడీ బుల్లెట్ రైల్‌...సముద్రంలోంచి వెళుతుంది

భార‌త‌దేశంలోనే మొట్ట‌మొద‌టి బుల్లెట్ రైల్ ఇప్ప‌టికే ప‌లు వ‌ర్గాల్లో ఆస‌క్తిని రేకెత్తిస్తుండ‌గా....ఇప్పుడు ఈ రైలు ఖాతాలో మ‌రో రికార్డు చేర‌నుంది. ఈ ఏడాది సెప్టెంబర్‌లో జపాన్ ప్రధాని షింజో అబెతో కలిసి ప్రధాని నరేంద్ర మోడీ బుల్లెట్ రైలు ప్రాజెక్టుకు శంకుస్థాపన చేసిన సంగ‌తి తెలిసిందే. ఇండియాలో తిరగనున్న తొలి బుల్లెట్ ట్రైన్ మరో ఘనతను సొంతం చేసుకుంది. ముంబై, అహ్మదాబాద్ మధ్య తిరిగే ఈ బుల్లెట్ రైలు.. మధ్యలో సముద్ర గర్భం నుంచి వెళ్లనుంది. ఏడు కిలోమీటర్ల మేర ఈ హైస్పీడ్ రైలు సముద్ర గర్భం నుంచి వెళ్లనుంది.

థానె క్రీక్ సమీపంలో ఈ అండర్ సీ టన్నెల్ నిర్మించనున్నారు. అయితే ఇది నిర్మించడం అంత ఈజీ కాదు. మొత్తం 21 కిలోమీటర్ల మేర టన్నెల్ నిర్మించనుండగా.. అందులో ఏడు కిలోమీటర్లు సముద్ర గర్భం నుంచి వెళ్లనున్నట్లు నేషనల హైస్పీడ్ రైల్ కార్పొరేషన్ లిమిటెడ్ ఎండీ అచల్ ఖరె వెల్లడించారు. థానె క్రీక్ దగ్గర ఒక్కో దాని మధ్య 250 మీటర్ల దూరంతో మొత్తం 66 బోర్‌హోల్స్ చేశారు. దీనికోసం జపాన్ నుంచి ప్రత్యేకమైన టెక్నాలజీ, మిషనరీని తీసుకొచ్చారు. అలలు ఎక్కువగా ఉన్న సమయంలోనే ఈ పని చేయడానికి వీలుంటుందని, అందువల్ల రోజుకు నాలుగు నుంచి ఐదు గంటల కన్నా ఎక్కువ పని చేయడానికి వీలుండదని అచల్ ఖరె తెలిపారు.

2022, ఆగస్ట్ 15 కల్లా సముద్ర గర్భంలో టన్నెల్ పనులను పూర్తి చేయాలని లక్ష్యంగా పెట్టుకున్నారు. వచ్చే ఏడాది ఈ టన్నెల్ నిర్మాణ పనులు ప్రారంభం కానున్నాయి. కేవలం ఈ టన్నెల్ నిర్మాణానికే రూ.3500 కోట్లు ఖర్చు చేయనున్నారు. ముంబై-అహ్మదాబాద్‌ మధ్య 508 కిలోమీటర్ల వరకు ఈ రైలు మార్గాన్ని నిర్మించనున్నారు. ప్రాజెక్ట్ వ్యయం  లక్షా 10వేల కోట్ల రూపాయలు. ఇందులో జపాన్ రుణం 88 వేల కోట్లు. కేవలం 0.1శాతం వడ్డీకే ఈ రుణం అందిస్తోంది.  ఈ మొత్తాన్ని 50 ఏళ్లలో తిరిగి చెల్లించాల్సి ఉంటుంది.

ఈ రైలు వేగం గంటకి 350 కిలోమీటర్లు. మూడు గంటల్లోనే అహ్మదాబాద్ నుంచి ముంబై వెళ్లొచ్చు. 20 వేల మంది కార్మికులకు ఉపాధి లభిస్తోంది. ప్రాజెక్ట్ పూర్తయ్యే నాటికి మరో నాలుగు వేల మందికి ఉద్యోగాలు లభిస్తాయి. ఇప్పటికే ఇంజినీరింగ్ పనులు ప్రారంభం అయ్యాయి. 2022 అంటే ఐదేళ్లలో ప్రాజెక్ట్ పూర్తి చేయాలని లక్ష్యంగా పెట్టుకున్నారు.

కాగా, బుల్లెట్ ట్రైన్ ప్రాజెక్ట్ పనుల ప్రారంభం తర్వాత.. ‘నమస్కార్’ అంటూ తన ప్రసంగాన్ని మొదలుపెట్టారు జపాన్ ప్రధాని షింజో అబే. ఈ ప్రతిష్టాత్మక ప్రాజెక్టు కోసం ఇప్పటికే 100 మంది ఇంజినీర్లు జపాన్ నుంచి భారత్‌కు వచ్చినట్లు తెలిపారు. హిందూ మహాసముద్ర ప్రాంతంలో భారత్-జపాన్ కీలక భాగస్వాములని అబే చెప్పారు. భారత్‌లో మానవ వనరులకి జపాన్ టెక్నాలజీ తోడైతే ఇండియా ‘ప్రపంచ కర్మాగారం’గా నిలుస్తుందని అబే స్పష్టం చేశారు. భారతీయ రైల్వే భద్రతకు జపాన్ పూర్తి సహకారం అందిస్తుందని హామీ ఇచ్చారు. జై జపాన్‌-జై ఇండియా నినాదంతో రెండు దేశాలు ముందుకు సాగాలని పిలుపునిచ్చారు. మళ్లీ భారత్‌కు వచ్చినప్పుడు ముంబై-అహ్మదాబాద్ బుల్లెట్ రైలులో ప్రయాణిస్తానని ఆశాభావం వ్యక్తం చేశారు.

 

రాజకీయ వార్తలు

 

సినిమా వార్తలు