అతడితో క్వారంటైన్ సూపర్-మలైకా


సల్మాన్ ఖాన్ తమ్ముడు అర్బాజ్‌ ఖాన్‌ను పెళ్లాడి ఇద్దరు పిల్లలకు తల్లి కూడా అయ్యాక.. 40 ప్లస్ వయసులో యంగ్ హీరో అర్జున్ కపూర్‌తో ప్రేమలో పడి.. భర్త నుంచి విడాకులు పొంది సంచలనం రేపిన బాలీవుడ్ భామ మలైకా అరోరా. ప్రేమలో పడటానికి వయసు అంతరం, కుటుంబ బంధాలు అడ్డంకి కాదని వీళ్లిద్దరూ రుజువు చేశారు. నాలుగైదేళ్లుగా వీళ్లిద్దరూ సహజీవనం చేస్తున్నారు.

ఇంతకుముందు తమ బంధాన్ని బయటపెట్టడానికి జంకేవారు కానీ.. ఈ మధ్య అలాంటిదేమీ కనిపించడం లేదు. ఇద్దరూ కలిసి బయట స్వేచ్ఛగా తిరిగేస్తున్నారు. విహార యాత్రలకూ వెళ్తున్నారు. కరోనా వల్ల లాక్ డౌన్ అమలయ్యాక వీళ్లిద్దరూ ఒకే ఇంట్లో ఉన్నారు. ఆ సంగతి బహిరంగ రహస్యమే. ఐతే దాని గురించి వీళ్లిద్దరూ ఓపెన్ అయింది లేదు. తాజా మలైకా ఓ ఇంటర్వ్యూలో తన క్వారంటైన్ అనుభవాల గురించి మాట్లాడింది.

మీరు క్వారంటైన్లో సుదీర్ఘ కాలం కలిసి ఉండాలంటే ఏ నటుడిని ఎంచుకుంటారు అని మలైకాను అడిగితే.. కొత్తగా ఎవరినో ఏంటి, తాను నిజంగానే ఓ నటుడితోనే క్వారంటైన్ రోజులను గడిపానని మలైకా చెప్పింది. ఆ నటుడు అర్జున్ కపూర్ అని చెప్పకుండా.. పరోక్షంగా అతడితో తన క్వారంటైన్ అనుభవాలను పంచుకుంది మలైకా.

‘‘నిజం చెప్పాలంటే.. నేను నిజంగానే ఓ నటుడితో కలిసి క్వారంటైన్లో ఉన్నాను. అతను చక్కటి వినోదాన్నిచ్చే వ్యక్తి. అతడితో ఉంటే ఒక్క క్షణం కూడా బోర్ కొట్టదు. నన్ను చూసి ఎంతసేపూ కామెడీ చేస్తుంటాడు. నన్ను నవ్విస్తూ ఉంటాడు. అతనంత సరదా వ్యక్తిని నేను చూడలేదు’’ అని మలైకా చెప్పింది. కొన్ని నెలల కిందట మలైకా కరోనా బారిన పడ్డట్లు మీడియాకు సమాచారం అందగా.. అర్జున్ కపూర్ సైతం వైరస్ బారిన పడే ఉంటాడని అంతా అనుకున్నారు. తర్వాత అదే నిజమని తేలింది. ఇద్దరూ తమ ఫ్లాట్లో క్వారంటైన్లో ఉండి కోలుకున్నారు.