పెళ్లికొడుకు అవుతోన్న మరో హీరో

ఎప్పుడూ షూటింగులతో బిజీగా వుండే తెలుగు సినిమా హీరోలకు ఈ లాక్‍డౌన్‍లో తీరిక దొరకడంతో తాపీగా పెళ్లిళ్లు చేసేసుకుంటున్నారు. లాక్‍డౌన్‍ ముందు వరకు బ్యాచ్‍లర్స్ కోటాలో వున్న నితిన్‍, రానా దగ్గుబాటి, నిఖిల్‍ అంతా వెడ్‍లాక్‍తో ఇంటివాళ్లయిపోయారు. త్వరలో మెగా హీరోయిన్‍ నిహారిక కూడా పెళ్లాడనుంది. త్వరలో మరో మోస్ట్ ఎలిజిబుల్‍ బ్యాచ్‍లర్‍ హీరో కూడా పెళ్లికొడుకు అవుతున్నట్టు సమాచారం. చూడ్డానికి ఇంకా లవర్‍బాయ్‍లానే వుంటాడు కానీ శర్వానంద్‍కి మొన్న మార్చిలో ముప్పయ్యారేళ్లు నిండాయి.

అతనికి ఇక పెళ్లి చేసేయాలని పెద్దలు నిర్ణయించారట. చాలా మంది యువ హీరోల్లా శర్వానంద్‍కి లవ్‍స్టోరీస్‍ అవీ లేవు. బుద్ధిగా పెద్దలు కుదిర్చిన సంబంధమే చేసుకుంటానని చాలాసార్లు చెప్పాడు. అతనికోసం వాళ్ల పెద్దలు ఒక సంబంధం చూసినట్టు, త్వరలోనే శర్వానంద్‍ పెళ్లి కబురు కూడా రాబోతున్నట్టు ఫిలింనగర్‍లో గట్టిగా వినిపిస్తోంది. మరి మళ్లీ షూటింగ్స్ మొదలయ్యే లోగా శర్వానంద్‍ కూడా పెళ్లి బాజా మోగించేస్తాడో లేక మరికొంత కాలం తర్వాత మూడు ముళ్లు వేస్తాడో చూడాలి. ఏదేమైనా ఈ లాక్‍డౌన్‍ వేళ తెలుగు చిత్ర పరిశ్రమ మాత్రం రాఘవేంద్రరావు ‘పెళ్లిసందడి’ సినిమాలా కళకళలాడిపోతోంది.