ఆ క్రేన్ నా మీద పడ్డా బాగుండేదే-శంకర్

ఆ క్రేన్ నా మీద పడ్డా బాగుండేదే-శంకర్

సౌత్ ఇండియన్ లెజెండరీ డైరెక్టర్ శంకర్ ఇప్పుడు తీవ్ర శోకంలో ఉన్నాడు. అతడితో చాలా ఏళ్లుగా ప్రయాణం చేస్తున్న, అత్యంత సన్నిహితులైన ఇద్దరు అసిస్టెంట్లను అతను కోల్పోవాల్సి వచ్చింది. ‘ఇండియన్-2’కు పని చేస్తున్న మరో టెక్నీషియన్‌ కూడా ఆయనకు దూరమయ్యాడు. ఈ ముగ్గురూ ఆయన కళ్ల ముందే క్రేన్ మీద పడి చనిపోయారు.

శంకర్ జీవితంలోనే ఇది అతి పెద్ద విషాదం అని.. ఆయన తీవ్రమైన శోకంలో ఉన్నాడని సన్నిహితులు చెబుతున్నారు. గత వారం రోజులుగా ఆయన ఈ ట్రామాను ఎదుర్కొంటున్నారు. ఇప్పుడే కాస్త తేరుకున్న శంకర్ ఆ విషాద ఘటనపై స్పందించాడు. ట్విట్టర్లో ఒక ఉద్వేగభరితమైన మెసేజ్ పెట్టారు. తాను ఆ ఘటన జరిగినప్పటి నుంచి పెద్ద షాక్‌లో ఉన్న విషయాన్ని శంకర్ ఈ ట్వీట్లో చెప్పుకొచ్చాడు. ఇంకా దాన్నుంచి పూర్తిగా కోలుకోలేదని చెప్పాడు.

ఈ విషాదం గురించి చెప్పడానికి తన దగ్గర మాటలు లేవని.. తనకు అత్యంత సన్నిహితులైన వ్యక్తుల్ని కోల్పోయానని.. ఈ బాధ తీరనిదని శంకర్ చెప్పాడు. తాను త్రుటిలో ప్రమాదం నుంచి తప్పించుకున్నానని.. కానీ ఆ క్రేన్ ఏదో తన మీద పడి ఉన్నా బాగుండేదని శంకర్ నిర్వేదంతో మాట్లాడాడు. చనిపోయిన వ్యక్తుల కుటుంబాలకు ప్రగాఢ సానుభూతి తెలిపాడు. ఆ ప్రమాదం జరిగినప్పటి నుంచి తాను నిద్ర లేని రాత్రులు గడుపుతున్నట్లు కూడా శంకర్ తెలిపాడు.

మృతుల కుటుంబాలకు ‘లైకా ప్రొడక్షన్స్’ అధినేతలతో పాటు కమల్ కూడా ఆర్థిక సాయం ప్రకటించగా.. శంకర్ కూడా వ్యక్తిగతంగా వాళ్లకు చేయగలిగింది చేస్తున్నట్లు సమాచారం. ఆ కుటుంబాల బాధ్యతను ఆయన తీసుకున్నట్లు చెబుతున్నారు. ఇదిలా ఉండగా.. షూటింగ్ సందర్భంగా సరైన రక్షణ చర్యలు చేపట్టలేదన్న ఆరోపణలపై చెన్నై పోలీసులు శంకర్, కమల్ హాసన్‌లతో పాటు నిర్మాతల్ని కూడా విచారిస్తున్నారు.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English